ന്യൂഡൽഹി: പ്രിലിമിനറി, മെയിൻ, ഇന്റർവ്യൂ ഘട്ടങ്ങളിൽ വിജയിച്ചിട്ടും മെഡിക്കൽ പരീക്ഷയ്ക്ക് ഒരു ദിവസം വൈകിയെത്തിയതിനാൽ സർക്കാർ തസ്തികയിലേക്കുള്ള ജോലി ലഭിക്കാതെ പോയ ജാർഖണ്ഡ് ആദിവാസി യുവതിക്ക് ജോലി നൽകാൻ ഉത്തരവിട്ട് സുപ്രിംകോടതി. നടപടിക്രമ തടസ്സങ്ങൾ പലപ്പോഴും പാർശ്വവൽക്കരിക്കപ്പെട്ട വിഭാഗങ്ങളിൽ നിന്നുള്ള തൊഴിലന്വേഷകരെ ബാധിക്കുന്നുണ്ട്. അവരെ ഒഴിവാക്കാനുള്ള വഴികൾ കണ്ടെത്തുന്നതിനുപകരം ഉന്നമനം ഉറപ്പാക്കാൻ സിസ്റ്റം മൃദുവായിരിക്കണമെന്നും കോടതി സൂചിപ്പിച്ചു

ജാർഖണ്ഡ് പബ്ലിക് സർവിസ് കമ്മിഷൻ പരസ്യത്തിലെ അടുത്ത ദിവസം ഹാജരാകണമെന്ന വാചകം അവ്യക്തവും നിർവചിക്കപ്പെടാത്തതുമാണെന്ന് നിരീക്ഷിച്ചാണ് ജസ്റ്റിസുമാരായ വിക്രംനാഥ്, സന്ദീപ് മേത്ത എന്നിവരടങ്ങിയ ബെഞ്ച് ഹരജിക്കാരിക്കൊപ്പം നിന്നത്. അഭിമുഖദിവസത്തിന് ശേഷമുള്ള ദിവസം മെഡിക്കൽ പരിശോധനയ്ക്ക് ഹാജരാകണമെന്ന് പറഞ്ഞിരുന്നു. എന്നാൽ, ഏത് ദിവസം ഹാജരാകണമെന്ന് കൃത്യമായി പറഞ്ഞിട്ടില്ലെന്നും ബെഞ്ച് ചൂണ്ടിക്കാട്ടി.

ALSO READ: ബംഗളുരു സ്‌ഫോടനക്കേസ്: അന്തിമവാദം പൂർത്തിയാക്കി നാല് മാസത്തിനകം വിധിപറയണമെന്ന് സുപ്രിംകോടതി

ജോലിക്കായുള്ള റിക്രൂട്ട്‌മെന്റ് നടപടിക്രമങ്ങൾ അടിസ്ഥാനപരമായ അവകാശങ്ങളെ ഇല്ലാതാക്കാനുള്ള ഉപകരണമായി മാറരുതെന്നും ബെഞ്ച് ആവർത്തിച്ചു. നടപടിക്രമ തടസ്സങ്ങൾ പലപ്പോഴും പാർശ്വവൽക്കരിക്കപ്പെട്ട വിഭാഗങ്ങളിൽ നിന്നുള്ള തൊഴിലന്വേഷകരെ ബാധിക്കുന്നുണ്ട്. അവരെ ഒഴിവാക്കാനുള്ള വഴികൾ കണ്ടെത്തുന്നതിനുപകരം ഉന്നമനം ഉറപ്പാക്കാൻ സിസ്റ്റം മൃദുവായിരിക്കണമെന്നും കോടതി സൂചിപ്പിച്ചു. ഒരു മാതൃകാ തൊഴിലുടമ എന്ന നിലയിൽ സർക്കാറും സംവിധാനങ്ങളും ഭരണഘടനയിൽ ഉൾപ്പെടുത്തിയിരിക്കുന്ന സമത്വതത്വങ്ങൾ പാലിച്ച്  പ്രവർത്തിക്കണമെന്നും കോടതി പറഞ്ഞു.