കൊച്ചി: പാലിയേക്കരയിലെ ടോള്‍പിരിവ് തടഞ്ഞ ഉത്തരവ് വീണ്ടും നീട്ടി ഹൈക്കോടതി. മുരിങ്ങൂരില്‍ സര്‍വീസ് റോഡ് ഇടിഞ്ഞതില്‍ ജില്ലാ കളക്ടര്‍ കോടതിക്ക് റിപ്പോര്‍ട്ട് നല്‍കിയിരുന്നു. മുരിങ്ങൂരില്‍ സംഭവിച്ചത് ഏത് ഭാഗത്തും നടക്കാന്‍ സാധ്യതയുണ്ടെന്നാണ് കളക്ടര്‍ നല്‍കിയ റിപ്പോര്‍ട്ടില്‍ പറയുന്നത്. ഇതിന് പിന്നാലെയാണ് ടോള്‍ പിരിവ് തല്‍ക്കാലം പുനരാരംഭിക്കേണ്ടതില്ലെന്ന് കോടതി വ്യക്തമാക്കിയത്. ഹരജി ഈ മാസം 30 ന് വീണ്ടും പരിഗണിക്കും. 

ആദ്യം തകര്‍ന്ന റോഡ് നന്നാക്കിയിട്ട് വരാന്‍ നിര്‍ദേശിച്ചാണ് കഴിഞ്ഞ ദിവസം ഹൈക്കോടതി ടോള്‍ വിലക്ക് നീട്ടിയത്. പാലിയേക്കര ടോള്‍ പ്ലാസയ്ക്ക് സമീപം എന്‍.എച്ച് 544ലെ മണ്ണുത്തി-ഇടപ്പള്ളി മേഖലയിലെ രൂക്ഷമായ ഗതാഗതക്കുരുക്ക് ചൂണ്ടിക്കാട്ടിയുള്ള ഹരജികളിലാണ് ജസ്റ്റിസ് എ. മുഹമ്മദ് മുഷ്താഖ്, ജസ്റ്റിസ് ഹരിശങ്കര്‍ വി. മേനോന്‍ എന്നിവരടങ്ങിയ ഡിവിഷന്‍ ബെഞ്ച് ടോള്‍പിരിവ് തടഞ്ഞത്.

2025 ഓഗസ്റ്റ് 6ലെ  ഉത്തരവുപ്രകാരം കോടതി ആദ്യം നാലാഴ്ചത്തേക്ക് ടോള്‍പിരിവ് നിര്‍ത്തിവച്ചിരുന്നു. ഇത് ഓഗസ്റ്റ് 18ലെ ഉത്തരവുവഴി സുപ്രിംകോടതി ശരിവച്ചു. തുടര്‍ന്നുള്ള ഉത്തരവുകളിലൂടെ വിലക്ക് വീണ്ടും നീട്ടി. കഴിഞ്ഞദിവസം ഹരജി പരിഗണിക്കവേ, ടോള്‍പിരിവ് നിര്‍ത്തിവച്ചത് പിന്‍വലിക്കുമെന്ന് ബെഞ്ച് സൂചന നല്‍കിയിരുന്നു. തുടര്‍ന്ന് ഇന്നലെ ഉത്തരവ് പുറപ്പെടുവിക്കുന്നതിനായി വിഷയം പരിഗണിച്ചപ്പോള്‍ മുരിങ്ങൂരിലെ സര്‍വിസ് റോഡ് തകര്‍ന്നിട്ടുണ്ടെന്ന് കോടതി ചൂണ്ടിക്കാട്ടി. 

മുരിങ്ങൂരിലെ സര്‍വിസ് റോഡ് ഒരാഴ്ച മുമ്പാണ് ടാര്‍ ചെയ്തത്. അതിനാല്‍ ടോള്‍പിരിവ് അനുവദിക്കാനാവില്ലെന്ന് കോടതി പറഞ്ഞു. തുടര്‍ന്നാണ് എന്‍.എച്ച്.എ.ഐയോട് കലക്ടര്‍ക്കും ഇടക്കാല കമ്മിറ്റിക്കും റിപ്പോര്‍ട്ട് സമര്‍പ്പിക്കാന്‍ നിര്‍ദേശിച്ചത്.