ചെന്നൈ: കരൂര്‍ ദുരന്തത്തില്‍ നടന്‍ വിജയ്‌ക്കെതിരെ രൂക്ഷ വിമര്‍ശനവുമായി നടന്‍ സത്യരാജ്. അറിയാതെ ചെയ്യുന്നതാണെങ്കില്‍ പിഴവാണെന്നും, അറിഞ്ഞുകൊണ്ട് ചെയ്തത് തെറ്റാണെന്നും സത്യരാജ് പറഞ്ഞു. വേലുച്ചാമിപുരത്ത് നടന്ന ടിവികെ റാലിയില്‍ തിക്കിലും തിരക്കിലും 40 പേര്‍ മരിച്ച സംഭവത്തില്‍ അനുശോചനം അറിയിച്ച് പോസ്റ്റ് ചെയ്ത വീഡിയോയിലാണ് സത്യരാജിന്റെ പ്രതികരണം. 

'' കരൂരില്‍ മരിച്ചവരുടെ കുടംബങ്ങള്‍ക്ക് ഞാന്‍ എന്റെ അഗാധമായ ദുഖം അറിയിക്കുന്നു. അറിയാതെ ചെയ്യുന്നതാണെങ്കില്‍ പിഴവ്. അറിഞ്ഞുകൊണ്ട് ചെയ്യുന്നത് തെറ്റ്.. പിഴവ് സംഭവിച്ചാല്‍ തിരുത്താന്‍ ശ്രമിക്കണം. തെറ്റ് ചെയ്താല്‍ ആവര്‍ത്തിക്കാതിരിക്കാന്‍ ശ്രമിക്കണം. തെറ്റ് ചെറുതായിരിക്കുമ്പോള്‍ തന്നെ തിരുത്തുക, അത് അറിഞ്ഞോ അറിയാതെയോ സംഭവിച്ചതാണെങ്കില്‍, അത് വീണ്ടും സംഭവിക്കാതിരിക്കാന്‍ ശ്രദ്ധിക്കുക''. സത്യരാജ് പറഞ്ഞു. 

അപകടത്തില്‍ നിരവധി രാഷ്ട്രീയ നേതാക്കളും, സെലിബ്രിറ്റികളും അനുശോചനവും പ്രതിഷേധവും രേഖപ്പെടുത്തി രംഗത്തെത്തിയിട്ടുണ്ട്. 

ALSO READ: ബിഹാറില്‍ 80,000 മുസ്‌ലിങ്ങളെ വോട്ടര്‍ പട്ടികയില്‍ നിന്ന് നീക്കം ചെയ്യാന്‍ അപേക്ഷ നല്‍കി ബിജെപി 

അതേസമയം കരൂര്‍ ദുരന്തത്തില്‍ മരിച്ചവരുടെ കുടുംബങ്ങള്‍ക്ക് 20 ലക്ഷം രൂപ ധനസഹായം പ്രഖ്യാപിച്ച് വിജയ് രം​ഗത്തെത്തി. നികത്താനാവാത്ത നഷ്ടമാണ് നമുക്കുണ്ടായത്. പ്രിയപ്പെട്ടവരുടെ വിയോഗം ഒരിക്കലും താങ്ങാവുന്നതല്ല. മരിച്ചവരുടെ കുടുംബങ്ങള്‍ക്ക് 20 ലക്ഷം രൂപയും പരിക്കേറ്റവര്‍ക്ക് രണ്ട് ലക്ഷം രൂപയും നല്‍കും. വലിയ ദുരന്തത്തെ നേരിടുന്ന നിങ്ങള്‍ക്ക് ഇത് ഒന്നുമാവില്ലെന്ന് അറിയാം. എങ്കിലും കുടുംബാംഗമെന്ന നിലയില്‍ ഇപ്പോള്‍ നിങ്ങളോടൊപ്പം നില്‍ക്കേണ്ടത് എന്റെ കടമയാണെന്നും വിജയ് പറഞ്ഞു.