2025 ഏഷ്യ കപ്പ് ഫൈനലിൽ പാകിസ്താനെതിരെ മിന്നും പ്രകടനം നടത്തിയ ഇന്ത്യൻ ഓൾ റൗണ്ടർ ശിവം ദുബെയെ പ്രശംസിച്ച് മുൻ ഇന്ത്യൻ താരം വരുൺ ആരോൺ. മത്സരത്തിൽ ദുബെയുടെ മൂന്ന് ഓവറുകൾ മികച്ചതായിരുന്നുവെന്നാണ് വരുൺ ആരോൺ പറഞ്ഞത്. ദുബെയെ ഇന്ത്യൻ ബൗളിങ്ങിലെ അൺസങ് ഹീറോയെന്നും മുൻ താരം വിശേഷിപ്പിച്ചു.

''ഈ ബൗളിംഗ് ആക്രമണത്തിലെ അൺസങ് ഹീറോ ശിവം ദുബെയാണ്. അവൻ മത്സരത്തിൽ മൂന്ന് ഓവറുകൾ എറിഞ്ഞ രീതി നോക്കൂ. ഫൈനലിൽ പന്തെറിയുമ്പോൾ വളരെയധികം സമ്മർദ്ദമുണ്ട്. ഫൈനലിൽ ന്യൂ ബോളിൽ മികച്ച ബൗളിംഗ് പുറത്തെടുക്കുകയെന്നത് എളുപ്പമുള്ള കാര്യമല്ല. അദ്ദേഹം തന്റെ ജോലി നന്നായി പൂർത്തിയാക്കി. 

മത്സരത്തിൽ മൂന്ന് ഓവർ എറിഞ്ഞ ദുബെ 23 റൺസാണ് വിട്ടു നൽകിയിരുന്നത്. ബാറ്റിങ്ങിലും മികച്ച പ്രകടനമാണ് താരം പുറത്തെടുത്തത്. ശിവം ദുബെ 22 പന്തിൽ രണ്ടു വീതം സിക്സുകളും ഫോറുകളും ഉൾപ്പെടെ 33 റൺസ് നേടിയാണ് ഇന്ത്യയുടെ വിജയത്തിൽ നിർണായകമായത്. തിലക് വർമ്മക്കൊപ്പം മികച്ച കൂട്ടുകെട്ട് പടുത്തുയർത്തിയാണ് താരം ഇന്ത്യക്ക് വിജയം സമ്മാനിച്ചത്. മത്സരത്തിൽ അർദ്ധ സെഞ്ച്വറി നേടിയാണ് തിലക് വർമ്മ തിളങ്ങിയത്. 53 പന്തുകളിൽ നിന്നും പുറത്താവാതെ 69 റൺസാണ് തിലക് വർമ്മ സ്വന്തമാക്കിയത്. മൂന്ന് ഫോറുകളും നാല് സിക്സുകളും അടങ്ങുന്നതായിരുന്നു താരത്തിന്റെ പ്രകടനം.

മത്സരത്തിൽ ഇന്ത്യൻ ബൗളിങ്ങിൽ നാല് വിക്കറ്റുകൾ വീഴ്ത്തിയ യാദവാണ് പാക്കിസ്താനെ തകർത്തത്. നാല് ഓവറിൽ മുപ്പതി റൺസ് വഴങ്ങിയാണ് താരം നാല് വിക്കറ്റുകൾ സ്വന്തമാക്കിയത്. ജസ്പ്രീത് ബുംറ, ശിവം ദുബെ, വരുൺ ചക്രവർത്തി എന്നിവർ രണ്ടു വീതം വിക്കറ്റുകളും നേടി മികച്ച പ്രകടനം കാഴ്ചവെച്ചു.

ഫൈനൽ പോരാട്ടത്തിൽ അഞ്ച് വിക്കറ്റിനായിരുന്നു ഇന്ത്യ പാകിസ്താനെ പരാജയപ്പെടുത്തിയത്. ദുബൈ ഇന്റർനാഷണൽ സ്റ്റേഡിയത്തിൽ നടന്ന മത്സരത്തിൽ ആദ്യം ബാറ്റ് ചെയ്ത പാക്കിസ്താൻ 19.1 ഓവറിൽ 146 റൺസിന് പുറത്താവുകയായിരുന്നു. വിജയലക്ഷ്യം പിന്തുടർന്നിറങ്ങിയ ഇന്ത്യ 19.2 ഓവറിൽ അഞ്ച് വിക്കറ്റുകൾ ബാക്കിനിൽക്കെ ലക്ഷ്യം മറികടക്കുകയായിരുന്നു. 

Former Indian player Varun Aaron praised Indian all-rounder Shivam Dube for his brilliant performance against Pakistan in the Asia Cup final. Varun Aaron said that Dube's three overs in the match were excellent.