അഹമ്മദാബാദ്: വെസ്റ്റ് ഇൻഡീസിനെതിരായ ആദ്യ ടെസ്റ്റിന്റെ രണ്ടാം ദിവസം സെഞ്ച്വറി നേടി തിളങ്ങി ഇന്ത്യൻ ഓപ്പണർ കെഎൽ രാഹുൽ. ഇന്ത്യക്കായി ഒന്നാം ഇന്നിങ്‌സിലാണ് രാഹുൽ സെഞ്ച്വറി നേടി മികച്ചു നിന്നത്.  തന്റെ ടെസ്റ്റ് കരിയറിലെ 11ാം സെഞ്ച്വറിയാണ് രാഹുൽ വിൻഡീസിനെതിരെ അടിച്ചെടുത്തത്.

ഈ സെഞ്ച്വറിക്ക് പിന്നലെ ഇന്ത്യക്കായി റെഡ് ബോൾ ക്രിക്കറ്റിൽ ഏറ്റവും കൂടുതൽ സെഞ്ച്വറി നേടിയ ഓപ്പണർമാരുടെ പട്ടികയിൽ നാലാം സ്ഥാനത്തേക്ക് മുന്നേറിയിരിക്കുകയാണ് രാഹുൽ. ഓപ്പണറായി 10 തവണയാണ് താരം ഇന്ത്യക്കൊപ്പം സെഞ്ച്വറി നേടിയത്. 

ഒമ്പത് സെഞ്ച്വറികൾ നേടിയ രോഹിത് ശർമ്മ, ഗൗതം ഗംഭീർ എന്നിവരെ ഒരുമിച്ച് മറികടന്നാണ് രാഹുലിന്റെ കുതിപ്പ്. 14 സെഞ്ച്വറികൾ നേടിയ മുരളി വിജയ് ആണ് പട്ടികയിലെ മൂന്നാമൻ. വീരേന്ദർ സെവാഗാണ് പട്ടികയിലെ രണ്ടാമൻ. 22 സെഞ്ച്വറികളാണ് സെവാഗ് നേടിയിട്ടുള്ളത്. 33 സെഞ്ച്വറികളുമായി സുനിൽ ഗാവസ്‌കർ ആണ് ഈ നേട്ടത്തിൽ ഒന്നാം സ്ഥാനത്തുള്ളത്. 

രാഹുലിന് പുറമെ ഇന്ത്യക്കായി ക്യാപ്റ്റൻ ശുഭ്മൻ ഗിൽ അർദ്ധ സെഞ്ച്വറി നേടിയും മികച്ച പ്രകടനം നടത്തി. 100 പന്തിൽ അഞ്ചു ഫോറുകൾ അടക്കം 50 റൺസാണ് ഇന്ത്യൻ ക്യാപ്റ്റന്റെ ബാറ്റിൽ നിന്നും പിറന്നത്.യശ്വസി ജെയ്‌സ്വാൾ 54 പന്തിൽ 36 റൺസ് നേടി പുറത്തായി. ഏഴ് ഫോറുകളാണ് താരത്തിന്റെ ബാറ്റിൽ നിന്നും പിറന്നത്. 

ആദ്യ ഇന്നിങ്സിൽ വെസ്റ്റ് ഇൻഡീസ് 162 റൺസിനാണ് പുറത്തായത്. ഇന്ത്യൻ ബൗളിങ്ങിൽ മുഹമ്മദ് സിറാജ് നാല് വിക്കറ്റും ജസ്പ്രീത് ബുംറ മൂന്ന് വിക്കറ്റും നേടി തിളങ്ങി. കുൽദീപ് യാദവ് രണ്ട് വിക്കറ്റും വാഷിംഗ്ടൺ സുന്ദർ ഒരു വിക്കറ്റും സ്വന്തമാക്കി. 

Indian opener KL Rahul shined on the second day of the first Test against West Indies by scoring a century. Rahul scored a century in the first innings for India.