കാഞ്ഞങ്ങാട്: അമ്മയാണ് ഒരു കുഞ്ഞ് പിറന്ന് വീണ് ആദ്യമുരിയാടുന്ന വാക്ക്. ജീവനോളം തന്നെ ചേര്‍ത്തു പിടിക്കുന്ന ആ സ്‌നേഹത്തെ എഴുതിത്തുടങ്ങിയാണ് അക്ഷരലോകത്തേക്ക്  കുഞ്ഞ് പ്രവേശിക്കുന്നതും. വിശ്വാസങ്ങളും ആചാരങ്ങളുമെല്ലാം ഒറ്റമനസ്സോടെ പഠിപ്പിക്കുന്നതും ഇതു തന്നെ. എന്നാല്‍ ചേര്‍ത്തു പിടിക്കാന്‍ അമ്മമാരോ മാറോടണക്കാന്‍ കുഞ്ഞുങ്ങളോ ശേഷിക്കാതെ തീര്‍ത്തും അനാഥരായിപ്പോയ ലക്ഷങ്ങളുടെ ഐക്യദാര്‍ഢ്യമായ തന്റെ കുഞ്ഞിന്റെ ആദ്യാക്ഷരം കുറിക്കാനാണ് കാഞ്ഞങ്ങാട് ആവിക്കരയിലെ പ്രിയേഷ് തീരുമാനിച്ചത്. അവള്‍ അറിയുന്ന, അവള്‍ കുറിക്കുന്ന ആദ്യ വാക്ക് നീതിക്ക് വേണ്ടിയുള്ള വിളിയാളമാവട്ടെ എന്ന് അയാള്‍ തീരുമാനിച്ചു. 

ALSO READ: സുമുദ് ഫ്‌ലോട്ടില്ലക്കെതിരായ അതിക്രമം: ഇസ്‌റാഈലിനെതിരെ പ്രതിഷേധത്തിരയായി ലോകം, ഇറ്റലിയില്‍ രാജ്യവ്യാപക പണിമുടക്ക്

അങ്ങനെ ഉള്ളം നിറയെ പ്രാര്‍ഥനയും സ്‌നേഹവും നന്മയും നിറച്ച് മനുഷ്യത്വത്തിന്റെ ഹൃദയഭാഷയില്‍ നിന്ന് അക്ഷരങ്ങള്‍ പെറുക്കിക്കൂട്ടി കുഞ്ഞുമോളുടെ നാവിന്‍തുമ്പില്‍ അദ്ദേഹം എഴുതി '    ഗസ്സ'. പിന്നെ അവളുടെ കുഞ്ഞിക്കൈകള്‍ പിടിച്ച് നീതിയുടെ നിഘണ്ടുവില്‍നിന്ന്
അക്ഷരങ്ങള്‍ പെറുക്കി ജീവിതത്തിലെ ആദ്യവാക്യം  അരിമണിയില്‍ കുറിപ്പിച്ചു. ''ഫലസ്തീന്‍ കുഞ്ഞുങ്ങളെ സംരക്ഷിക്കുക''. രണ്ടുവയസ്സുകാരി നിള ലക്ഷ്മിയുടെ ഈ എഴുത്തിനിരുത്തിന് മാതാവ് രേഷ്മയും ചേച്ചി വൈഗ ലക്ഷ്മിയും സാക്ഷിയായി. 

കുഞ്ഞുങ്ങള്‍ പട്ടിണികിടന്നും ബോംബുപൊട്ടിയും കൊല്ലപ്പെടുമ്പോള്‍, അവളുടെ കുഞ്ഞുകൈകൊണ്ട് മറ്റൊന്നും എഴുതിക്കാന്‍ തനിക്കാവുമായിരുന്നില്ലെന്ന് പറയുന്നു പ്രിയേഷ്. അക്ഷരമെന്നത് സമരത്തിന്റെ മറ്റൊരു മുഖമാണ്. ഈ രണ്ടാം വയസ്സില്‍ തന്നെ മകള്‍ക്ക് അനീതിക്കെതിരായ ഒരു സമരമായി മാറാന്‍ കഴിയട്ടെ. വളര്‍ന്നു വലുതാകുമ്പോള്‍ അവളുടെ ആദ്യക്ഷരത്തെ കുറിച്ച് അവള്‍ അഭിമാനിക്കട്ടെ, വാനോളം- അദ്ദേഹം പറഞ്ഞു.

ആവിക്കര സി.പി.എം ബ്രാഞ്ച് സെക്രട്ടറിയായ പ്രിയേഷ്  ചാരിറ്റി, സാമൂഹിക പ്രവര്‍ത്തകനുമാണ്.

in a touching moment, a father inscribes the word ‘gaza’ on his newborn daughter's tongue, symbolizing resistance from birth. guiding her little finger, he then writes the message: “protect palestinian children” — a powerful act of solidarity and hope.