ചെന്നൈ: തമിഴക വെട്രി കഴകം (ടി.വി.കെ) റാലിക്കിടെ ഇരുചക്രവാഹനത്തില്‍ ഇടിച്ച വിജയ് യുടെ പ്രചാരണവാഹനം പിടിച്ചെടുക്കാന്‍ പൊലിസ്. ഹൈക്കോടതി വിമര്‍ശനത്തെ തുടര്‍ന്നാണ് തീരുമാനം. വിജയ് യുടെ പ്രചാരണ വാഹനം ഇരുചക്ര വാഹനത്തില്‍ ഇടിക്കുന്നതിന്റെ വീഡിയോ ദൃശ്യങ്ങള്‍ പുറത്തുവന്നിട്ടും വാഹനം പിടിച്ചെടുത്ത് കേസ് രജിസ്റ്റര്‍ ചെയ്യാത്തത് എന്തുകൊണ്ടാണെന്ന് കോടതി ഇന്നലെ ചോദിച്ചിരുന്നു. 

ബൈക്ക് ബസിനടിയില്‍ പെട്ടിട്ടും ബസ് നിര്‍ത്താതെ മുന്നോട്ട് എടുത്തുവെന്ന് കോടതി ചൂണ്ടിക്കാട്ടിയിരുന്നു. പ്രദേശത്തേയും വിജയ് യുടെ പ്രചാരണ വാഹനത്തിനകത്തും പുറത്തും നിന്നുമുള്ള സി.സി.ടി.വി ദൃശ്യങ്ങളും പിടിച്ചെടുക്കാനും കോടതി ഉത്തരവിട്ടിട്ടുണ്ട്. 

കരൂരില്‍ തമിഴക വെട്രി കഴക(ടി.വി.കെ) ത്തിന്റെ റാലിക്കിടെ തിക്കിലും തിരക്കിലും 41 പേര്‍ മരിച്ച സംഭവത്തില്‍ വിജയ് ഉള്‍പ്പെടെയുള്ള നേതാക്കള്‍ക്കെതിരെ മദ്രാസ് ഹൈക്കോടതി രൂക്ഷവിമര്‍ശനം നടത്തിയിരുന്നു. ദുരന്തത്തെ കുറിച്ച് പ്രത്യേക സംഘം (എസ്.ഐ.ടി) അന്വേഷിക്കണമെന്ന് മദ്രാസ് ഹൈക്കോടതിയുടെ മധുര ബെഞ്ച് ഉത്തരവിട്ടു. കരൂരില്‍ സംഭവിച്ചത് മനുഷ്യ നിര്‍മിത ദുരന്തമെന്നു നിരീക്ഷിച്ച കോടതി സംഭവത്തില്‍ കണ്ണടയ്ക്കാനാകില്ലെന്നും ആരും നിയമത്തിന് അതീതരല്ലെന്നും വ്യക്തമാക്കി.

ALSO READ: കരൂർ ആൾക്കൂട്ട ദുരന്തം മനുഷ്യനിർമിതമാണെന്ന് ഹൈക്കോടതി; അന്വേഷണം എസ്.ഐ.ടിക്ക്

ദുരന്തത്തില്‍ ടി.വി.കെ അധ്യക്ഷനും നടനുമായ വിജയ്ക്കെതിരേ കേസെടുക്കണമെന്ന ഹരജിയിലാണ് ജസ്റ്റിസ് സെന്തില്‍ കുമാറിന്റെ രൂക്ഷവിമര്‍ശനം. നിരപരാധികളായ സ്ത്രീകളും കുട്ടികളും ഉള്‍പ്പെടെ നിരവധി പേര്‍ മരിച്ചുവീണിട്ടും പാര്‍ട്ടി നേതാവ് ഒളിച്ചോടിയെന്നും ഇതെന്ത് പാര്‍ട്ടിയാണെന്നും കോടതി വാക്കാല്‍ ചോദിച്ചു. ഇത്രയും ആളുകള്‍ മരിച്ചുവീണ സ്ഥലത്തുനിന്ന് രക്ഷപ്പെട്ടയാള്‍ക്ക് നേതൃഗുണമില്ല. നടനും രാഷ്ട്രീയക്കാരനുമായ വിജയ് യുടെ മാനസികാവസ്ഥയെ പ്രതിഫലിക്കുന്നതാണ് ഇതെന്നും കോടതി പറഞ്ഞു.  

നിലവിലെ അന്വേഷണത്തില്‍ അതൃപ്തി പ്രകടിപ്പിച്ച കോടതി സര്‍ക്കാര്‍ സ്വീകരിച്ച നടപടികളെയും വിമര്‍ശിച്ചു. ഇതുവരെ രണ്ടു പേരെ മാത്രമാണ് അറസ്റ്റ് ചെയ്തത്. അന്വേഷണം കൃത്യമായി മുന്നോട്ടുകൊണ്ടുപോകുന്നതില്‍ സര്‍ക്കാരിനെന്താണ് മടി. ടി.വി.കെയോട് സര്‍ക്കാരിന് എന്താണ് ഇത്രയും വിധേയത്വമെന്നും കോടതി ചോദിച്ചു.

ALSO READ: കേരളത്തിൽ കുട്ടികൾക്കെതിരെയുള്ള അതിക്രമങ്ങളും കൊലപാതകങ്ങളും വർധിക്കുന്നു; നാഷണൽ ക്രൈം റെക്കോഡ്‌സ് ബ്യൂറോ റിപ്പോർട്ട്

അതേസമയം, ദുരന്തത്തെ കുറിച്ച് സി.ബി.ഐ അന്വേഷണം ആവശ്യപ്പെട്ടുള്ള നാല് ഹരജികള്‍ ഹൈക്കോടതി തള്ളി. 

സംസ്ഥാനത്ത് റാലികള്‍ നടത്തുന്നതുമായി ബന്ധപ്പെട്ട് പൊതു മാര്‍ഗനിര്‍ദേശങ്ങള്‍ പുറത്തിറക്കുന്നതിനുമുമ്പ് വലിയ റാലികള്‍ക്ക് അനുമതി നല്‍കില്ലെന്ന് സര്‍ക്കാര്‍ അറിയിച്ചു. ടി.വി.കെ സംസ്ഥാന ജനറല്‍ സെക്രട്ടറി ബുസി ആനന്ദ്, ഡെപ്യൂട്ടി ജനറല്‍ സെക്രട്ടറി സി.ടി.ആര്‍ നിര്‍മല്‍ കുമാര്‍ എന്നിവര്‍ സമര്‍പ്പിച്ച മുന്‍കൂര്‍ ജാമ്യഹരജി ഹൈക്കോടതി തള്ളി.

English Summary: Following the tragic Karur rally accident where 41 people died, the Tamil Nadu High Court has strongly criticized actor-politician Vijay and the Tamil Vetrikazagam (TVK) party. The court ordered police to seize Vijay’s campaign vehicle after video footage showed it colliding with a two-wheeler during the rally. The court questioned why no action had been taken earlier despite clear CCTV evidence of the vehicle hitting a bike and continuing without stopping. The court also ordered the seizure of all CCTV footage inside and around Vijay’s vehicle.