ചെന്നൈ: തമിഴക വെട്രി കഴകം (ടി.വി.കെ) റാലിക്കിടെ കരൂരിൽ തിക്കിലും തിരക്കിലും 41 പേർ മരിച്ച ദുരന്തത്തെ കുറിച്ച് പ്രത്യേക സംഘം (എസ്.ഐ.ടി) അന്വേഷിക്കണമെന്ന് മദ്രാസ് ഹൈക്കോടതിയുടെ മധുര ബെഞ്ച്. കരൂരിൽ സംഭവിച്ചത് മനുഷ്യ നിർമിത ദുരന്തമെന്നു നിരീക്ഷിച്ച കോടതി സംഭവത്തിൽ കണ്ണടയ്ക്കാനാകില്ലെന്നും ആരും നിയമത്തിന് അതീതരല്ലെന്നും വ്യക്തമാക്കി.

ദുരന്തത്തിൽ ടി.വി.കെ അധ്യക്ഷനും നടനുമായ വിജയ്‌ക്കെതിരേ കേസെടുക്കണമെന്ന ഹരജിയിലാണ് ജസ്റ്റിസ് സെന്തിൽ കുമാറിന്റെ രൂക്ഷവിമർശനം. നിരപരാധികളായ സ്ത്രീകളും കുട്ടികളും ഉൾപ്പെടെ നിരവധി പേർ മരിച്ചുവീണിട്ടും പാർട്ടി നേതാവ് ഒളിച്ചോടിയെന്നും ഇതെന്ത് പാർട്ടിയാണെന്നും കോടതി വാക്കാൽ ചോദിച്ചു. ഇത്രയും ആളുകൾ മരിച്ചുവീണ സ്ഥലത്തുനിന്ന് രക്ഷപ്പെട്ടയാൾക്ക് നേതൃഗുണമില്ല. നടനും രാഷ്ട്രീയക്കാരനുമായ വിജയ് യുടെ മാനസികാവസ്ഥയെ പ്രതിഫലിക്കുന്നതാണ് ഇതെന്നും കോടതി പറഞ്ഞു.  

നിലവിലെ അന്വേഷണത്തിൽ അതൃപ്തി പ്രകടിപ്പിച്ച കോടതി സർക്കാർ സ്വീകരിച്ച നടപടികളെയും വിമർശിച്ചു. ഇതുവരെ രണ്ടു പേരെ മാത്രമാണ് അറസ്റ്റ് ചെയ്തത്. അന്വേഷണം കൃത്യമായി മുന്നോട്ടുകൊണ്ടുപോകുന്നതിൽ സർക്കാരിനെന്താണ് മടി. ടി.വി.കെയോട് സർക്കാരിന് എന്താണ് ഇത്രയും വിധേയത്വമെന്നും കോടതി ചോദിച്ചു. ദുരന്തത്തെ കുറിച്ച് സി.ബി.ഐ അന്വേഷണം ആവശ്യപ്പെട്ടുള്ള നാല് ഹരജികൾ ഹൈക്കോടതി തള്ളി. 

സംസ്ഥാനത്ത് റാലികൾ നടത്തുന്നതുമായി ബന്ധപ്പെട്ട് പൊതു മാർഗനിർദേശങ്ങൾ പുറത്തിറക്കുന്നതിനുമുമ്പ് വലിയ റാലികൾക്ക് അനുമതി നൽകില്ലെന്ന് സർക്കാർ അറിയിച്ചു. ടി.വി.കെ സംസ്ഥാന ജനറൽ സെക്രട്ടറി ബുസി ആനന്ദ്, ഡെപ്യൂട്ടി ജനറൽ സെക്രട്ടറി സി.ടി.ആർ നിർമൽ കുമാർ എന്നിവർ സമർപ്പിച്ച മുൻകൂർ ജാമ്യഹരജി ഹൈക്കോടതി തള്ളി.