ദുബൈ: യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂമിൻ്റെ എളിമയും ദയയും വ്യക്തമാക്കുന്ന വീഡിയോ സമൂഹമാധ്യമങ്ങളിൽ വൈറലാകുന്നു. ഒരു മാളിലൂടെ നടക്കുന്നതിനിടെ, അദ്ദേഹത്തെ തിരിച്ചറിയാതെ വഴി മുറിച്ചുകടക്കാൻ ശ്രമിച്ച ഒരു സാധാരണ സ്ത്രീക്ക് വേണ്ടി അദ്ദേഹം തൻ്റെ കൂടെയുള്ളവരെ നിർത്തി വഴി നൽകുന്നതാണ് വീഡിയോയിലുള്ളത്.

ദുബൈയിൽ താമസിക്കുന്നവരുടെയും സന്ദർശകരുടെയും ഹൃദയം കവർന്ന ഈ ദൃശ്യം, ഒരു ഭരണാധികാരി തൻ്റെ ജനങ്ങളോട് കാണിക്കുന്ന ഊഷ്മളതയുടെ ഉദാഹരണമായി മാറി. പൊതുസ്ഥലങ്ങളിൽ ജനങ്ങളോട് ദയയോടെ ഇടപെഴകാനുള്ള ഷെയ്ഖ് മുഹമ്മദിന്റെ സന്നദ്ധത ഇതിനു മുൻപും പ്രശംസ നേടിയിട്ടുണ്ട്.

അടുത്തിടെ പ്രചരിച്ച വീഡിയോ ക്ലിപ്പിൽ, ഷെയ്ഖ് മുഹമ്മദ് തൻ്റെ പകൂടെയുള്ളവരോടൊപ്പം ഒരു മാളിലൂടെ നടക്കുന്നത് കാണാം. സാധാരണയായി, ഭരണാധികാരിയെ കാണുമ്പോൾ ആളുകൾ ബഹുമാനസൂചകമായി മാറിനിൽക്കാറുണ്ട്. എന്നാൽ ഇത്തവണ, അദ്ദേഹത്തെ ശ്രദ്ധിക്കാതെ ഒരു സ്ത്രീ തൻ്റെ ലക്ഷ്യസ്ഥാനത്തേക്ക് നടന്നുപോകുന്നതിനിടെ ഭരണാധികാരിയുടെ മുന്നിലെ വഴി മുറിച്ചുകടക്കാൻ ശ്രമിച്ചു.

ഈ സമയം, ഭരണാധികാരിയുടെ സുരക്ഷാ ഉദ്യോഗസ്ഥരിൽ ഒരാൾ സ്ത്രീയെ തടയാനോ വഴി മാറ്റിവിടാനോ ശ്രമിക്കുന്നുണ്ടായിരുന്നു. എന്നാൽ അപ്രതീക്ഷിതമായി ഷെയ്ഖ് മുഹമ്മദ് ഇടപെടുകയും, തൻ്റെ വടി ഉപയോഗിച്ച് തന്നെയും ഒപ്പമുള്ളവരെയും വഴിയിൽ നിർത്തിക്കൊണ്ട്, ആ സ്ത്രീക്ക് കടന്നുപോകാൻ ആദ്യം അവസരം നൽകുകയും ചെയ്തു. മറ്റൊരു സന്ദർശകൻ റെക്കോർഡുചെയ്‌ത ഈ വീഡിയോയിലെ അദ്ദേഹത്തിന്റെ പ്രവൃത്തി നിമിഷനേരം കൊണ്ട് ഇന്റർനെറ്റിൽ തരംഗമായി.

ഹൃദയസ്പർശിയായ കമന്റുകൾ

സമൂഹമാധ്യമങ്ങളിൽ നിരവധി താമസക്കാരും പൗരന്മാരും ഷെയ്ഖ് മുഹമ്മദിന്റെ ഈ പ്രവൃത്തിയെ പ്രശംസിച്ച് രം​ഗത്തെത്തി. "ഇത്രയും എളിമയുള്ളവരും ബഹുമാന്യരുമായ നേതാക്കൾ ഉള്ള രാജ്യത്ത് ജീവിക്കുന്നതിൽ അഭിമാനിക്കുന്നു," എന്ന് പലരും കമന്റ് ചെയ്തു.

ദുബൈയിലെ ജനങ്ങളോടുള്ള ആത്മാർത്ഥമായ സ്നേഹവും അനുകമ്പയിൽ വേരൂന്നിയ നേതൃത്വവുമാണ് ഷെയ്ഖ് മുഹമ്മദ് തൻ്റെ പ്രവർത്തനങ്ങളിലൂടെ ലോകത്തിന് മുന്നിൽ അവതരിപ്പിക്കുന്നത്. തെരുവിൽ താമസക്കാരെ കണ്ടുമുട്ടുമ്പോഴോ ഹൃദയസ്പർശിയായ കഥകളോട് പ്രതികരിക്കുമ്പോഴോ അദ്ദേഹത്തിൻ്റെ ഈ എളിമ പ്രകടമാകാറുണ്ട്.

a heartwarming video captures dubai ruler sheikh mohammed bin rashid al maktoum pausing his walk to let an unaware woman cross his path in a mall, gesturing security to stand down; netizens praise his humility as a mark of authentic leadership.