അഹമ്മദാബാദ്: വിവാഹത്തിന് ഒരു മണിക്കൂര്‍ മുമ്പ് വധുവിനെ  കൊലപ്പെടുത്തി പ്രതിശ്രുത വരന്‍. സാരിയെയും പണത്തെയും ചൊല്ലിയുള്ള തര്‍ക്കമാണ് കൊലപാതകത്തില്‍ കലാശിച്ചതെന്ന് പൊലീസ് പറഞ്ഞു. 

ഗുജറാത്തിലെ ഭാവ്നഗറിലെ ടെക്‌രി ചൗക്കിന് സമീപമാണ് സംഭവം നടന്നത്. ശനിയാഴ്ച്ച രാത്രി വിവാഹം നടക്കാന്‍ ഒരു മണിക്കൂര്‍ മാത്രം ശേഷിക്കെയാണ് ക്രൂരകൊലപാതകം. 

സോണി ഹിമ്മത് റഥോഡ് എന്ന യുവതിയാണ് കൊല്ലപ്പെട്ടത്. ലിവ് ഇന്‍ പങ്കാളിയായ സജന്‍ ബറയ്യയാണ് പ്രതി. കഴിഞ്ഞ ഒന്നര വര്‍ഷത്തോളമായി ഇരുവരും ഒരുമിച്ചാണ് താമസിച്ചിരുന്നതെന്ന് പൊലീസ് പറഞ്ഞു. 

തുടര്‍ന്ന് വിവാഹിതരാകാന്‍ തീരുമാനിക്കുകയും വിവാഹനിശ്ചയം കഴിയുകയും ചെയ്തിരുന്നു. വിവാഹത്തിന് മുന്നോടിയായുള്ള ഏകദേശം ചടങ്ങുകളൊക്കെ പൂര്‍ത്തിയായ ശേഷമാണ് ഇരുവരും തമ്മില്‍ വഴക്കുണ്ടായത്. 

വിവാഹത്തിന് ധരിക്കേണ്ട സാരി വാങ്ങാനായി ചെലവിട്ട പണത്തെ ചൊല്ലി ഇരുവരും തമ്മില്‍ തര്‍ക്കമുണ്ടാവുകയും പിന്നാലെ ദേഷ്യത്തില്‍ സജന്‍ ഇരുമ്പ് ദണ്ഡ് ഉപയോഗിച്ച് സോണിയെ മര്‍ദ്ദിക്കുകയുമായിരുന്നു. തല ഭിത്തിയില്‍ ഇടിപ്പിക്കുകയും ചെയ്‌തെന്നും സോണി സംഭവസ്ഥലത്തുവച്ചുതന്നെ മരിച്ചെന്നും പൊലിസ് പറഞ്ഞു. 

സംഭവത്തിന് പിന്നാലെ സജന്‍ ഒളിവിലാണ്. ശനിയാഴ്ച സജന്‍ അയല്‍വാസിയുമായും വഴക്കുണ്ടാക്കിയിരുന്നു. ഇയാള്‍ക്കെതിരെ അയല്‍വാസി പൊലീസില്‍ പരാതി നല്‍കിയിരുന്നു. പ്രതിയെ പിടികൂടാന്‍ അന്വേഷണം തുടങ്ങിയെന്ന് പൊലീസ് പറഞ്ഞു.

In Ahmedabad, a groom killed his bride just an hour before their wedding following an argument over money spent on her wedding saree. The incident took place near Tekri Chowk in Bhavnagar, Gujarat.