കോഴിക്കോട്: ജനകീയ പ്രവര്‍ത്തനങ്ങളിലൂടെ നാട്ടുകാരുടെ ഹൃദയത്തിലേറിയ ചേച്ചിയുടെ വഴി തന്നെ ഇത്തവണ അനുജത്തിയുടെതും. പുറമേരി പഞ്ചായത്തിലാണ് സഹോദരിമാരായ യു.ഡി.എഫ് സ്ഥാനാര്‍ഥികള്‍ മത്സരംഗത്തുള്ളത്. ശ്രീജ തൂണേരിക്കും ശ്രീലതക്കും ഇത്തവണത്തെ തെരഞ്ഞെടുപ്പ് വീട്ടുകാര്യമാണ്.

പുറമേരി പഞ്ചായത്ത് ഒമ്പതാം വാര്‍ഡില്‍ നിന്നാണ് പി. ശ്രീലത മത്സരിക്കുന്നത്. സഹോദരി ശ്രീജ തൂണേരി ബ്ലോക്ക് പഞ്ചായത്ത് പുറമേരി ഡിവിഷനില്‍ നിന്നാണ് ജനവിധി തേടുന്നത്. ശ്രീജക്കിത് കന്നിയങ്കമാണെങ്കില്‍ ശ്രീലതയുടേത് നാലാം ഊഴമാണ്. കഴിഞ്ഞ മൂന്നുതവണ തുടര്‍ച്ചയായി പുറമേരി പഞ്ചായത്ത് അംഗമാണ് ശ്രീലത. ആദ്യതവണ കല്ലുമ്പുറം വാര്‍ഡില്‍ മത്സരിച്ച് വിജയിച്ച ശ്രീലത പിന്നീട് നടേമ്മലില്‍ ( 7ാം വാര്‍ഡ്) നിന്ന് രണ്ട് തവണ തെരഞ്ഞെടുക്കപ്പെട്ടതാണ്. ഇത്തവണ നടേമ്മല്‍ ഭാഗം ഒമ്പതാം വാര്‍ഡായി മാറിയെങ്കിലും യു.ഡി.എഫ് സ്ഥാനാര്‍ഥിക്ക് മാറ്റമില്ല.