ജുബൈല്‍: നാല് വര്‍ഷമായി നാട്ടില്‍ പോകാതെ ഗള്‍ഫില്‍ കഴിഞ്ഞിരുന്ന പ്രവാസി മലയാളിയെ ആറുനില കെട്ടിടത്തില്‍നിന്നു വീണ് മരിച്ചനിലയില്‍ കണ്ടെത്തി. കൊല്ലം കടയ്ക്കല്‍ സ്വദേശി നീലാംബരി വീട്ടില്‍ പ്രശാന്ത് ബാബുവിനെയാണ് (42) ജുബൈലില്‍ മരിച്ച നിലയില്‍ കണ്ടെത്തിയത്. 
കഴിഞ്ഞദിവസം ഉച്ചയ്ക്കാണ് താമസസ്ഥലത്തെ ആറുനില കെട്ടിടത്തില്‍ നിന്നും വീണ നിലയില്‍ ഇദ്ദേഹത്തെ കണ്ടെത്തിയത്. 15 വര്‍ഷമായി ജുബൈല്‍ റെഡിമിക്‌സ് കമ്പനിയില്‍ സൂപ്പര്‍വൈസറായി ജോലി ചെയ്യുകയായിരുന്നു പ്രശാന്ത്. നാലുവര്‍ഷത്തിലേറെയായി നാട്ടില്‍ പോയിട്ട്. കഴിഞ്ഞ വര്‍ഷം ഭാര്യയെയും മക്കളെയും സന്ദര്‍ശക വിസയില്‍ സൗദിയില്‍ കൊണ്ടുവന്നിരുന്നു. 
പിതാവ്: പരേതനായ ബാബു. മാതാവ്: പരേതയായ രമണി. ഭാര്യ: ബിന്ദു. വൈഗ, വേദ എന്നിവരാണ് മക്കള്‍. സംഭവമറിഞ്ഞ് അല്‍ഹസയില്‍ ജോലി ചെയ്യുന്ന സഹോദരന്‍ നിഷാന്ത് സ്ഥലത്തെത്തിയിട്ടുണ്ട്. പൊലീസ് മേല്‍നടപടികള്‍ സ്വീകരിക്കുകയും മൃതദേഹം ജുബൈല്‍ ജനറല്‍ ആശുപത്രി മോര്‍ച്ചറിയിലേക്ക് മാറ്റുകയും ചെയ്തു. മൃതദേഹം നാട്ടിലെത്തിച്ച് സംസ്‌കരിക്കും.