തിരുവനന്തപുരം: ഗവര്‍ണറുടെ ഔദ്യോഗിക വസതിയായ രാജ്ഭവന്‍ ഇന്ന് മുതല്‍ ലോക്ഭവന്‍ എന്ന് അറിയപ്പെടും. ഗവര്‍ണര്‍ രാജേന്ദ്ര ആര്‍ലേക്കര്‍ ഇന്ന് ഇതുസംബന്ധിച്ച വിജ്ഞാപനമിറക്കും. ആഭ്യന്തര മന്ത്രാലയത്തിന്റെ ഉത്തവ് പ്രകാരമാണ് പേര്മാറ്റം. കൊളോണിയല്‍ സ്വാധീനമുള്ള പേരാണ് രാജ്ഭവന്‍ എന്ന വിലയിരുത്തലിനെ തുടര്‍ന്നാണ് മാറ്റം. 

കഴിഞ്ഞ വര്‍ഷം രാഷ്ട്രപതിയുടെ സാന്നിധ്യത്തില്‍ ചേര്‍ന്ന ഗവര്‍ണര്‍മാരുടെ സമ്മേളനത്തില്‍ കേരള ഗവര്‍ണര്‍ രാജേന്ദ്ര ആര്‍ലേക്കറാണ് രാജ്യത്തെ എല്ലാ രാജ്ഭവനുകളുടെയും പേര് ലോക്ഭവന്‍ എന്നാക്കണമെന്ന് നിര്‍ദേശിച്ചത്. ഗവര്‍ണറുടെ വസതികള്‍ക്ക് പുറമെ, ലഫ്റ്റനന്റ്ഗവര്‍ണര്‍മാരുടെ ഔദ്യോഗിക വസതിയായ രാജ്‌നിവാസിന്റെ പേര് 'ലോക്‌നിവാസ്' എന്നും മാറ്റാന്‍ തീരുമാനിച്ചിട്ടുണ്ട്. 

അസം, പശ്ചിമ ബംഗാള്‍ രാജ്ഭവനുകളുടെ പേര് മാറ്റിക്കൊണ്ടുള്ള വിജ്ഞാപനവും കഴിഞ്ഞ ദിവസം പുറത്തിറക്കി. അസം ഗവര്‍ണര്‍ ലക്ഷ്മണ്‍പ്രസാദ് ആചാര്യ വെള്ളിയാഴ്ചയും ബംഗാള്‍ ഗവര്‍ണര്‍ സി വി ആനന്ദബോസ് ശനിയാഴ്ചയുമാണ് പേരുമാറ്റത്തിനായുള്ള ഔദ്യോഗിക വിജ്ഞാപനം പുറത്തിറക്കിയത്.