തൊടുപുഴ: 16 വയസുള്ള മകന്‍ തദ്ദേശ തെരഞ്ഞെടുപ്പില്‍ യു.ഡി.എഫ് സ്ഥാനാര്‍ത്ഥിക്കുവേണ്ടി പ്രവര്‍ത്തിച്ചതിന്റെ പേരില്‍ അമ്മയെ സഹകരണബാങ്കിലെ ജോലിയില്‍ നിന്ന് സി.പി.എം ഭരണസമിതി പിരിച്ച് വിട്ടതായി പരാതി. തൊടുപുഴ കാരിക്കോട് സര്‍വീസ് സഹകരണ ബാങ്കിലെ സ്വീപ്പര്‍ നിസ ഷിയാസിനെയാണ് പിരിച്ചുവിട്ടത്.

നിസയെ ജോലിയില്‍ തുടരാന്‍ അനുവദിച്ചാല്‍ പാര്‍ട്ടി വിടുമെന്ന് പ്രാദേശിക നേതാക്കള്‍ ഭീഷണി മുഴക്കിയതിന് പിന്നാലെയാണ് നടപടിയെന്നാണ് ആരോപണം. 

ആറ് വര്‍ഷമായി ബാങ്കിലെ താല്‍ക്കാലിക ജീവനക്കാരിയാണ് നിസ. 5000 രൂപ മാത്രമായിരുന്നു മാസ ശമ്പളം. തൊടുപുഴ നഗരസഭയിലെ 21ആം വാര്‍ഡില്‍ മത്സരിച്ച കോണ്‍ഗ്രസ് സ്ഥാനാര്‍ത്ഥി വിഷ്ണു കോട്ടപ്പുറത്തിനായി നിസയുടെ 16 വയസുള്ള മകന്‍ പ്രചാരണത്തിന് ഇറങ്ങി. തെരഞ്ഞെടുപ്പില്‍ വിഷ്ണു ജയിച്ചതോടെയാണ് ബാങ്ക് ഭരണ സമിതി പക പോക്കല്‍ നടത്തിയതെന്നാണ് നിസയുടെ ആരോപണം. ഡിസംബര്‍ 31 വരെ വന്നാല്‍ മതിയെന്ന് ഡിസംബര്‍ 28നാണ് അറിയിച്ചതെന്നും നിസ പറഞ്ഞു.

ഭര്‍ത്താവ് മരിച്ച നിസയുടെ ഉപജീവന മാര്‍ഗമായിരുന്നു ബാങ്കിലെ ജോലി. എന്നാല്‍ ജോലിയില്‍ തൃപ്തിയില്ലാത്തതിനാലാണ് മറ്റൊരാളെ നിയമിച്ചതെന്നാണ് ബാങ്ക് ഭരണസമിതിയുടെ വിശദീകരണം.