മെല്‍ബണ്‍: ആസ്‌ട്രേലിയയിലെ മെല്‍ബണില്‍ ഇന്ത്യന്‍ കമ്മ്യൂണിറ്റി സെന്ററിന് പുറത്ത് സ്ഥാപിച്ച മഹാത്മാഗാന്ധിയുടെ വെങ്കല പ്രതിമ മോഷണം പോയി. ന്യൂഡല്‍ഹിയിലെ ഇന്ത്യന്‍ കൗണ്‍സില്‍ ഫോര്‍ കള്‍ച്ചറല്‍ റിലേഷന്‍സാണ് (ICCR) സെന്ററിന് പ്രതിമ സമ്മാനിച്ചത്. കാല്‍പാദത്തിന് മുകളില്‍ വെച്ച് അറുത്തുമാറ്റിയാണ് പ്രതിമ കടത്തികൊണ്ട് പോയത്. 

തങ്കളാഴ്ച്ച പുലര്‍ച്ചെ 12.50 ഓടെയാണ് മോഷണം നടന്നതെന്ന് ആസ്‌ട്രേലിയ ടുഡേ റിപ്പോര്‍ട്ട് ചെയ്തു. 426 കിലോ ഭാരമുള്ള പ്രതിമ ആംഗിള്‍ ഡ്രൈന്‍ഡര്‍ ഉപയോഗിച്ചാണ് മുറിച്ചെടുത്തത്. സിസിടിവി പരിശോധനയില്‍ മുഖംമൂടി ധരിച്ചെത്തിയ മൂന്നുപേര്‍ മോഷണം നടത്തിയതായി തെളിഞ്ഞിട്ടുണ്ട്. സംഭവത്തില്‍ വിക്ടോറിയ പൊലിസ് കേസെടുത്ത് അന്വേഷണം ആരംഭിച്ചിട്ടുണ്ട്.

ALSO READ: മോദിയുടെ അജണ്ടകള്‍ക്കായി എപ്സ്റ്റീനെ ഉപയോഗിച്ചു; അനില്‍ അംബാനിയും എപ്സ്റ്റീനും തമ്മില്‍ രഹസ്യബന്ധമെന്ന് വെളിപ്പെടുത്തല്‍ | Epstein Files

2021 നവംബര്‍ 12ന് മുന്‍ ആസ്‌ട്രേലിയന്‍ പ്രധാനമന്ത്രി സ്‌കോട്ട് മോറിസണ്‍ ആണ് ഈ പ്രതിമ ഉദ്ഘാടനം ചെയ്തത്. സ്ഥാപിച്ച് ആദ്യ 24 മണിക്കൂറിനുള്ളില്‍ തന്നെ പ്രതിമക്ക് നേരെ ആക്രമണം നടന്നിരുന്നു. ആസ്‌ട്രേലിയയില്‍ ഇന്ത്യ വിരുദ്ധ വികാരം ശക്തമാകുന്ന പശ്ചാത്തലത്തില്‍ അന്വേഷണം ഊര്‍ജിതമാക്കാനാണ് പൊലിസ് തീരുമാനം. സംശയാസ്പദമായ എന്തെങ്കിലും പ്രവര്‍ത്തികള്‍ ശ്രദ്ധയില്‍പ്പെട്ടാല്‍ ഉടന്‍ റിപ്പോര്‍ട്ട് ചെയ്യണമെന്ന് പൊലിസ് മുന്നറിയിപ്പ് നല്‍കിയിട്ടുണ്ട്. പ്രധാനമായും സ്‌ക്രാപ്പ് മെറ്റല്‍ കടകള്‍ കേന്ദ്രീകരിച്ചാണ് അന്വേഷണം പുരോഗമിക്കുന്നത്.

a bronze statue of mahatma gandhi gifted by iccr was stolen from outside an indian community center in melbourne after being cut off above the feet.