കുണിയ: കേരള മുസ് ലിം പൈതൃക തുടർച്ചയായ സമസ്തയെ അടയാളപ്പെടുത്തുന്ന വിജ്ഞാന കോശം ഒരുക്കി വിദ്യാർഥിനികൾ. മലപ്പുറം മരവട്ടം ഗ്രേസ് വാലി ഇസ്‌ലാമിക് വനിതാ കോളജിലെ പ്രതിഭകളാണ് റഫറൻസ് ഗ്രന്ഥമൊരുക്കിയത്. സമസ്ത ഗ്ലോബൽ എക്സ്പോയിലെ ഗ്രേസ് വാലി പവലിയനിലാണ് ഇത് ചരിത്രാന്വേഷികൾക്ക് മുന്നിൽ അവതരിപ്പിച്ചത്. എസ്.എൻ.ഇ.സിക്ക് കീഴിൽ സനാഇയ്യ കോഴ്സിന് പഠിക്കുന്ന ഹയർ സെക്കൻഡറി,ഡിഗ്രി വിദ്യാർഥിനികളാണ് കേരളീയ മുസ് ലിം ചരിത്ര ഏടുകളും സമസ്തയുടെ ചരിത്രം, വർത്തമാനം തുടങ്ങിയവും അക്ഷരമാലയിൽ കോർത്തിണക്കി വിജ്ഞാന വിരുന്നൊരുക്കിയത്. മലയാളത്തിൽ തയാറാക്കിയ ഗ്രന്ഥത്തിന് 1181 പേജുകളുണ്ട്.

കേരളത്തിലെ ഇസ്‌ലാമിക പാരമ്പര്യം, സമസ്തയുടെ രൂപീകരണം, നേതൃത്വം നൽകിയവർ, സമസ്ത സമ്മേളനങ്ങൾ, സമസ്തയുടെ പോഷക ഘടകങ്ങളും അവയുടെ പ്രധാന പദ്ധതികളും, സമസ്തയുടെ കീഴിലുള്ള വിവിധ സംവിധാനങ്ങൾ, സ്ഥാപനങ്ങൾ തുടങ്ങിയവ അക്ഷരമാല ക്രമത്തിൽ ചേർത്തുവച്ചിട്ടുണ്ട്. സമസ്ത കേരളാ ഇസ്‌ലാം മത വിദ്യാഭ്യാസ ബോർഡിന് കീഴിലുള്ള പതിനൊന്നായിരത്തിലധികം മദ്റസകളുടെ പേരും സ്ഥലവും റെയ്ഞ്ച് അടിസ്ഥാനത്തിൽ വിജ്ഞാന കോശത്തിലുണ്ട്. മുഴുവൻ റെയ്ഞ്ചുകളും അതിന് കീഴിലുള്ള മദ്റസകളും അക്ഷരങ്ങൾ ക്രമീകരിച്ചാണ് നൽകിയത്. കേരളത്തിൽ മതരംഗത്ത് നിലകൊള്ളുന്ന ഇതര സംഘടനകൾ, ബിദഇ സംഘടനകളുടെ നയനിലപാടുകളിലെ വൈകല്യം എന്നിവയും പഠന വിധേയമാക്കുന്നുണ്ട്.

ALSO READ: സമസ്ത ​ഗ്ലോബൽ എക്സ്പോ; ശംസുൽ ഉലമയുടെ ജീവിതത്തിന്റെ നേർസാക്ഷ്യം വിവരിച്ച് വിദ്യാർഥികൾ  

നൂറ്റാണ്ട് പിന്നിടുന്ന സമസ്തയുടെ ആദ്യകാലം മുതലുള്ള മുശാവറ യോഗങ്ങളിലെ തീരുമാനങ്ങളും ഇതിൽ ഉൾക്കൊള്ളിച്ചിട്ടുണ്ട്. ഗ്രന്ഥത്തിൽ നൽകിയ വിവരണത്തോടൊപ്പം പേജുകളിൽ ക്യു.ആർ കോഡ് നൽകിയിട്ടുണ്ട്. ഇതു മുഖേന നേതാക്കളുടെ വിഡിയോ, പുസ്തകത്തിൽ പ്രതിപാദിക്കുന്ന സുപ്രധാന സ്ഥലങ്ങളുടെ മാപ്പ് തുടങ്ങിയവയിലേക്കും എത്താം. വിവര ശേഖരണം, ഗ്രന്ഥരചന, എഡിറ്റിങ്, ഡി.ടി.പി, ലേ ഔട്ട് എന്നിവ വിദ്യാർഥിനികൾ തന്നെയാണ് നിർവഹിച്ചത്. കഴിഞ്ഞ വർഷം ഒക്ടോബർ മുതലാണ് വിജ്ഞാനകോശത്തിൻ്റെ പ്രവർത്തനങ്ങൾ തുടങ്ങിയത്. ഇതേ പ്രതിപാദ്യവുമായി വെബ്സൈറ്റും ഇവർ രൂപകൽപന ചെയ്തിട്ടുണ്ട്.