കുണിയ: സമസ്തയുടെ വരുന്ന 100 വർഷത്തേക്കുള്ള ഫ്യൂച്ചർ പ്രൊജക്ട് 'സമസ്ത യൂനിവേഴ്സ് ' അവതരിപ്പിച്ച് ആലത്തൂർപടി ദർസ് വിദ്യാർഥികൾ. സമസ്തയുടെ ആദർശ പ്രചാരണത്തിന് സഹായകമാകുന്ന നൂതന രീതികളും ജനജീവിതം കൂടുതൽ ലളിതമാക്കുന്ന അത്യാധുനിക സാങ്കേതികവിദ്യകളുമാണ് ഗ്ലോബൽ എക്സ്പോയിൽ അവതരിപ്പിച്ച പ്രൊജക്ടിലുള്ളത്.

പേഷ്യൻ്റ് അസിസ്റ്റൻ്റ് സിസ്റ്റം രോഗാവസ്ഥയിലായ ഒരാൾക്ക് അത്യാഹിതമോ മറ്റോ ഉണ്ടായാൽ ഉടനെ ഡോക്ടറെ അല്ലെങ്കിൽ ബന്ധപ്പെട്ടവരെ അറിയിക്കാനുള്ള സംവിധാനമാണിത്. തൊട്ടരികിലുള്ള സ്വിച്ച് അമർത്തുന്നതിലൂടെ വയർ കണക്ഷൻ പോലുമില്ലാതെ മറ്റുള്ളവരുടെ അടുത്ത് അലാം ഉണ്ടാകുന്നു. അതുപോലെ തൊട്ടടുത്തുള്ള ലൈറ്റ്, ഫാൻ ഓഫ് ചെയ്യാൻ ഈ പ്രൈസ് ലെസ്സായ ഈ വിദ്യയിലൂടെ സാധിക്കും.  നെറ്റ്‌വർക്കോ വയറിങ് കണക്ഷനോ ഇതിനു വേണ്ട. രണ്ട് വൈ ഫൈ മൊഡ്യൂളുകളിലൂടെയാണ് ഇത് വർക്ക്  ചെയ്യുന്നത്.
സ്മാർട്ട് ക്യാപ് ഫോർ ബ്ലൈൻഡ് പീപ്പിൾ. അന്ധത അനുഭവിക്കുന്ന ആളുകൾക്ക് മറ്റൊരാളുടെ സഹായം കൂടാതെ നടക്കാൻ സാധിക്കുന്ന സ്മാർട്ട് തൊപ്പിയാണിത്. ചുറ്റുഭാഗത്തും ഘടിപ്പിച്ച സെൻസറുകളിലൂടെ തൊട്ടടുത്തുവരുന്ന എല്ലാ തടസങ്ങളെയും തിരിച്ചറിയാൻ സാധിക്കും. വശങ്ങൾ മനസിലാക്കാൻ അതതു  ഭാഗത്തെ സെൻസർ മാത്രമാണ് പ്രവർത്തിക്കുക. 

റോബോട്ടിക് മേഖലയിൽ വരുന്ന ഇത്തരം സംവിധാനങ്ങൾ സമസ്ത  കേന്ദ്രമുശാവറ അംഗം ഡോ. സി.കെ അബ്ദുറഹ്മാൻ ഫൈസി അരിപ്രയുടെ നേതൃത്വത്തിലുള്ള ദർസ് വിദ്യാർഥികളാണ് ഒരുക്കിയിരിക്കുന്നത്.