ഭോപ്പാൽ: മകന്റെ വിവാഹത്തിന് ബന്ധുക്കളെ ക്ഷണിക്കാൻ പോയ അച്ഛനും മകനും ബന്ധുവായ യുവതിയും വാഹനാപകടത്തിൽ കൊല്ലപ്പെട്ടു. മധ്യപ്രദേശിലെ രേവ ജില്ലയിൽ ശനിയാഴ്ച ഉച്ചയ്ക്ക് ശേഷമാണ് നാടിനെ നടുക്കിയ ഈ ദാരുണ സംഭവം നടന്നത്. അമിതവേഗത്തിലെത്തിയ ഓഡി കാർ ബൈക്കിന് പിന്നിലിടിച്ചാണ് അപകടമുണ്ടായത്. ഭഗവത് വിശ്വകർമ (51), മകൻ ശിവം വിശ്വകർമ (23), അനന്തരവൾ ശീതൾ (28) എന്നിവരാണ് മരിച്ചത്.

അപകടം സംഭവിച്ചത് ഇങ്ങനെ:

ഭഗവത് വിശ്വകർമയുടെ മൂത്തമകൻ്റെ വിവാഹം ഫെബ്രുവരി 24-ന് നടക്കാനിരിക്കുകയായിരുന്നു. ഇതിന്റെ ക്ഷണക്കത്തുകൾ വിതരണം ചെയ്യുന്നതിനായി ബന്ധുവീടുകളിലേക്ക് പോകുമ്പോഴാണ് വിധി മരണത്തിന്റെ രൂപത്തിലെത്തിയത്.ഏകദേശം 150 കിലോമീറ്ററോളം വേഗതയിൽ പാഞ്ഞെത്തിയ ഓഡി കാറാണ് അപകടമുണ്ടാക്കിയതെന്ന് ദൃക്‌സാക്ഷികൾ പറയുന്നു. റോഡ് മുറിച്ചുകടക്കാൻ ബൈക്ക് തിരിക്കുന്നതിനിടെ പിന്നിൽ നിന്നെത്തിയ കാർ ബൈക്കിനെ ഇടിച്ചുതെറിപ്പിക്കുകയായിരുന്നു.ഇടിയുടെ ആഘാതത്തിൽ റോഡിലേക്ക് തെറിച്ചുവീണ മൂവരും സംഭവസ്ഥലത്ത് വെച്ച് തന്നെ മരിച്ചു.

നിയമനടപടികൾ:

അപകടത്തിന് പിന്നാലെ ഓഡി കാർ ഡ്രൈവറെ പൊലിസ് കസ്റ്റഡിയിലെടുത്ത് കേസെടുത്തു. മൃതദേഹങ്ങൾ പോസ്റ്റ്‌മോർട്ടം നടപടികൾക്കായി രേവയിലെ സഞ്ജയ് ഗാന്ധി ആശുപത്രിയിലേക്ക് മാറ്റി. ഒരു വിവാഹത്തിന്റെ ഒരുക്കങ്ങൾ നടന്നിരുന്ന വീട്ടിലേക്ക് മൂന്ന് മരണവാർത്തകൾ ഒരുമിച്ചെത്തിയത് ഗ്രാമത്തെ ഒന്നടങ്കം കണ്ണീരിലാഴ്ത്തിയിരിക്കുകയാണ്.