തിരൂരങ്ങാടി: കരിങ്കല്‍ ക്വാറികളില്‍ ഉപയോഗിക്കുന്ന ഉഗ്രസ്‌ഫോടന ശേഷിയുള്ള സ്‌ഫോടകവസ്തുക്കളുടെ വന്‍ ശേഖരം പിടികൂടി. വെള്ളിയാഴ്ച രാത്രി 12 മണിയോടെ ചെമ്മാട്-കോഴിക്കോട് റോഡ് മാനീപ്പാടത്തിലുള്ള ഫര്‍ഹ ഹോളോക്‌സ് കമ്പനി കോമ്പൗണ്ടിലാണ് സംഭവം.

കോഴിക്കോട് മാവൂര്‍ സ്വദേശി ഹാരിസ് എന്നയാളുടെ ഉടമസ്ഥതയില്‍ ഉള്ളതാണ് ഫര്‍ഹ കമ്പനി. വലിയ ഉള്ളിച്ചാക്കുകള്‍ക്കുള്ളില്‍ ഒളിപ്പിച്ച നിലയിലായിരുന്നു സ്‌ഫോടക വസ്തുക്കളടങ്ങിയ പെട്ടികള്‍.

10,500 സന്റ് ഡെറ്റ് ഷോക് ട്യൂബ് വയറുകള്‍, 1,34,400എക്‌സ്‌പ്ലോസിവ് ജലാറ്റിന്‍ സ്റ്റിക്കുകളുമാണ് കണ്ടെടുത്തത്. ഓരോ പെട്ടിയിലും 300 സന്റ് ഡെറ്റ് ഷോക് ട്യൂബ് വയറുകളടങ്ങിയ 35 പെട്ടികളും, ഓരോ പെട്ടിയിലും 300 എക്‌സ്‌പ്ലോസിവ് ജലാറ്റിന്‍ സ്റ്റിക്കുകളടങ്ങുന്ന 448 പെട്ടികളുമാണ് വാഹനത്തില്‍ നിന്നും കണ്ടെത്തിയത്.
കെ.എല്‍ 10 ബി.എഫ് 8395 രജിസ്റ്റര്‍ നമ്പര്‍ ലോറിക്ക് പുറമേ കെ.എല്‍ 46 ജെ 2239 എത്തിയോസ് കാര്‍, കെ.എല്‍ 57 എസ് 9925 പിക്കപ്പ് ലോറിയും പൊലിസ് കസ്റ്റഡിയിലെടുത്തിട്ടുണ്ട്.

ALSO READ: തിരുവല്ല സ്പായിലെ കൂട്ടബലാത്സംഗം: പ്രതികള്‍ സംസ്ഥാനം വിട്ടതായി പൊലിസ്; അന്വേഷണം സഹപ്രവര്‍ത്തകയിലേക്കും

പൊലിസിന് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ നടത്തിയ പരിശോധനയിലാണ് സ്‌ഫോടക വസ്തുക്കള്‍ പിടികൂടിയത്. വാഹനങ്ങളില്‍ ഉണ്ടായിരുന്നവര്‍ രക്ഷപ്പെട്ടതായി പൊലിസ് പറഞ്ഞു.

മലപ്പുറത്തു നിന്നും ബോംബ് സ്‌ക്വാഡ്, ഫോറന്‍സിക് വിദഗ്ധര്‍, വിരലടയാള വിദഗ്ദ്ധര്‍, എന്നിവര്‍ സംഭവ സ്ഥലത്തെത്തി പരിശോധന നടത്തി. തിരൂരങ്ങാടി എസ്.എച്ച്.ഒ ബി. പ്രദീപ്കുമാറിന്റെ നേതൃത്വത്തിലുള്ള പൊലിസ് സംഘമാണ് കേസ് അന്വേഷിക്കുന്നത്.

A massive cache of high-intensity explosives used for granite quarry blasting was seized from the compound of Farha Holobricks Company at Manippad on the Chemmad–Kozhikode Road in Tirurangadi, Malappuram district, around midnight on Friday.