ഗുവാഹത്തി: അസം നിയമസഭാ തെരഞ്ഞെടുപ്പിന് മുന്നോടിയായി മുസ്ലിം വിരുദ്ധതയും വിദ്വേഷവും പ്രചരിപ്പിക്കുന്ന വിഡിയോ ഔദ്യോഗിക എക്‌സ് (മുന്‍പ് ട്വിറ്റര്‍) ഹാന്‍ഡിലിലൂടെ പങ്കുവെച്ച ബി.ജെ.പി നടപടിക്കെതിരെ രാജ്യവ്യാപക പ്രതിഷേധം. അസം മുഖ്യമന്ത്രി ഹിമന്ത ബിശ്വ ശര്‍മ്മ മുസ്ലിംകളെ തോക്കിന്‍മുനയില്‍ നിര്‍ത്തി വെടിവെക്കുന്നതായി ചിത്രീകരിക്കുന്ന എ.ഐ നിര്‍മ്മിത വിഡിയോയാണ് വിവാദമായത്. പ്രതിഷേധം കനത്തതോടെ ബി.ജെ.പി വീഡിയോ പിന്‍വലിച്ചെങ്കിലും ഇതിനെതിരെ സുപ്രിംകോടതി ഇടപെടണമെന്ന ആവശ്യവുമായി പ്രതിപക്ഷം രംഗത്തെത്തി. 'വിദേശികളില്ലാത്ത അസം', 'പാകിസ്താനിലേക്ക് പോകൂ' തുടങ്ങിയ വിദ്വേഷ വാചകങ്ങളാണ് വീഡിയോയില്‍ ഉണ്ടായിരുന്നത്. 

പ്രതിപക്ഷത്തിന്റെ കടുത്ത ഭാഷയിലുള്ള വിമര്‍ശനം

വീഡിയോ വംശഹത്യക്കുള്ള ആഹ്വാനമാണെന്ന് കോണ്‍ഗ്രസ് ജനറല്‍ സെക്രട്ടറി കെ.സി വേണുഗോപാല്‍ ആരോപിച്ചു. 'ന്യൂനപക്ഷങ്ങളെ പോയിന്റ് ബ്ലാങ്കില്‍ വെടിവെച്ച് കൊല്ലുന്ന വിഡിയോ പങ്കുവെക്കുന്നത് ഫാസിസ്റ്റ് ഭരണകൂടത്തിന്റെ ക്രൂരമായ സ്വപ്‌നമാണ്. ഇത് വെറുമൊരു ട്രോള്‍ വീഡിയോ അല്ല, മറിച്ച് തലപ്പത്തുനിന്ന് ഒഴുകുന്ന വിഷമാണ്. പ്രധാനമന്ത്രി നരേന്ദ്രമോദി ഇതിനെതിരെ നടപടിയെടുക്കുമെന്ന് പ്രതീക്ഷയില്ല, എന്നാല്‍ നീതിന്യായ വ്യവസ്ഥ ഇടപെടണം,- അദ്ദേഹം ആവശ്യപ്പെട്ടു.

മുസ്ലിം ഭൂരിപക്ഷ രാജ്യമായ മലേഷ്യ സന്ദര്‍ശിക്കുന്ന വേളയില്‍ പ്രധാനമന്ത്രി ഇത്തരം പ്രവൃത്തികള്‍ക്ക് മൗനാനുവാദം നല്‍കുന്നത് ലജ്ജാകരമാണെന്ന് കോണ്‍ഗ്രസ് കേരള ഘടകം വിമര്‍ശിച്ചു. ഭരണഘടനാ വിരുദ്ധമായ ഈ പ്രവര്‍ത്തിക്ക് ബിജെപി മാപ്പുപറയണമെന്നും ഹിമന്ത ബിശ്വ ശര്‍മ്മയെ മുഖ്യമന്ത്രി സ്ഥാനത്തുനിന്ന് പുറത്താക്കണമെന്നും അവര്‍ ആവശ്യപ്പെട്ടു.

प्रिय प्रधानमंत्री जी,
आपका दुलारा मुख्यमंत्री अपने चुनावी विज्ञापन में सीधे मुसलमानों के सीने पर जो गोली मार रहा है वो दरअसल संविधान की छाती पर मार रहा है, एैसी ही एक गोली गोडसे ने महात्मा गॉंधी के सीने पर मारा था।
अब भले ही ये वीडियो डिलीट कर दिया गया हो लेकिन @narendramodi जी… pic.twitter.com/A6hreObA0Q

— Imran Pratapgarhi (@ShayarImran) February 8, 2026

മുഖ്യമന്ത്രിയുടെ വെടിയുണ്ടകള്‍ യഥാര്‍ത്ഥത്തില്‍ തുളച്ചുകയറുന്നത് ഇന്ത്യന്‍ ഭരണഘടനയുടെ നെഞ്ചിലാണെന്ന് കോണ്‍ഗ്രസ് എംപി ഇമ്രാന്‍ പ്രതാപ്ഗഡി അഭിപ്രായപ്പെട്ടു. വിഡിയോ ഡിലീറ്റ് ചെയ്ത് ബി.ജെ.പി ഭീരുത്വമാണ് കാണിച്ചതെന്ന് കോണ്‍ഗ്രസ് നേതാവ് അല്‍ക്ക ലാംബ പരിഹസിച്ചു. മുതിര്‍ന്ന മാധ്യമപ്രവര്‍ത്തകന്‍ രാജ്ദീപ് സര്‍ദേശായി ഉള്‍പ്പെടെയുള്ളവര്‍ ഇതിനെ ഗൗരവകരമായ ക്രിമിനല്‍ കുറ്റമായാണ് വിശേഷിപ്പിച്ചത്. 

നേരത്തെയും സമാനമായ രീതിയില്‍ 'മുസ്ലിം മുക്ത ഭാരതം' എന്ന പ്രമേയത്തില്‍ വിദ്വേഷ വീഡിയോകള്‍ അസം ബിജെപി പങ്കുവെച്ചിരുന്നു. ബംഗാളി മുസ്ലിംകളെ (മിയ) വോട്ടര്‍ പട്ടികയില്‍ നിന്ന് ഒഴിവാക്കുമെന്നും അവരെ സാമ്പത്തികമായി ബുദ്ധിമുട്ടിക്കുമെന്നുമുള്ള മുഖ്യമന്ത്രിയുടെ വിവാദ പ്രസ്താവനകള്‍ക്കെതിരെ ജംഇയ്യത്തുല്‍ ഉലമായെ ഹിന്ദ് നല്‍കിയ ഹര്‍ജി നിലവില്‍ സുപ്രിംകോടതിയുടെ പരിഗണനയിലാണ്.

ALSO READ: കണ്ണുകെട്ടി കൈവിലങ്ങ് അണിയിച്ച് മണിക്കൂറുകളോളം ചോദ്യം ചെയ്യല്‍; റഫാ അതിര്‍ത്തി തുറന്നത് പേരിന് മാത്രം; നിയന്ത്രണങ്ങള്‍ക്കും ദുരിതയാത്രയ്ക്കും കുറവില്ല

English Summary: An official video shared by the Assam BJP, showing CM Himanta Biswa Sarma targeting and shooting Muslims using AI-generated visuals, has ignited nationwide outrage. While the BJP deleted the video following a backlash, opposition leaders including K.C. Venugopal and Imran Pratapgarhi condemned it as an incitement to genocide and a direct attack on the Indian Constitution. Prominent figures have called for the Supreme Court's intervention and the immediate dismissal of the Chief Minister, especially as the provocative content coincides with ongoing communal tensions and upcoming elections in the state.