ന്യൂഡല്‍ഹി: രാജ്യത്തെ ആറ് സംസ്ഥാനങ്ങളിലും കേന്ദ്രഭരണ പ്രദേശങ്ങളിലും പ്രത്യേക വോട്ടര്‍ പട്ടിക പുതുക്കല്‍ (Special Intensive Revision - SIR) നടപടികള്‍ പൂര്‍ത്തിയായി. അര്‍ഹരല്ലാത്ത ലക്ഷക്കണക്കിന് വോട്ടര്‍മാരെ പട്ടികയില്‍ നിന്ന് ഒഴിവാക്കിയതായി കേന്ദ്ര തെരഞ്ഞെടുപ്പ് കമീഷന്‍ അറിയിച്ചു.   

പുതുക്കിയ പട്ടിക പ്രകാരം ഏറ്റവും കൂടുതല്‍ വോട്ടര്‍മാര്‍ ഒഴിവാക്കപ്പെട്ടത് ഗുജറാത്തിലാണ്. ഏകദേശം 68,12,711 വോട്ടര്‍മാരാണ് ഗുജറാത്തിലെ പട്ടികയില്‍ നിന്നും പുറത്തായിട്ടുള്ളത്. എസ്.ഐ.ആറിന് മുമ്പ് 5.08 കോടി (5,08,43,436) ആയിരുന്ന പട്ടിക പുതുക്കലിന് ശേഷം 4.40 കോടി (4,40,30,725) ആയി കുറഞ്ഞു (13.40%). 

ALSO READ: തെരഞ്ഞെടുപ്പിനിടെ ബംഗാളിൽ സി.എ.എ നടപ്പാക്കാൻ കേന്ദ്രം; ഉന്നതാധികാര സമിതി രൂപീകരിച്ചു

മധ്യപ്രദേശ്, രാജസ്ഥാന്‍, ഛത്തീസ്ഗഢ് തുടങ്ങിയവയാണ്  എസ്.ഐ.ആര്‍ അന്തിമ പട്ടിക നടപടികള്‍  പൂര്‍ത്തിയായ മറ്റു  സംസ്ഥാനങ്ങള്‍. മധ്യപ്രദേശില്‍ 34,25,078 വോട്ടര്‍മാരെ ഒഴിവാക്കി, വോട്ടര്‍മാരുടെ എണ്ണം 5,74,06,143 ല്‍ നിന്ന് 5,39,81,065 (5.97%) ആയി കുറച്ചു. 5.39 കോടി വോട്ടര്‍മാരെ പുതിയ പട്ടികയില്‍ ഉള്‍പ്പെടുത്തിയിട്ടുണ്ട്. മറ്റ് സംസ്ഥാനങ്ങളിലും ഗണ്യമായ പരിഷ്‌കാരങ്ങള്‍ നടന്നു. രാജസ്ഥാനില്‍ വോട്ടര്‍മാരുടെ എണ്ണം 5,46,56,215 ല്‍ നിന്ന് 5,15,19,929 ആയി (31,36,286) കുറഞ്ഞു. ഛത്തീസ്ഗഢില്‍ 2,12,30,737 ല്‍ നിന്ന് 1,87,30,914 ആയി (24,99,823) കുറഞ്ഞു. 

കേരളത്തിലും വോട്ടര്‍മാരുടെ എണ്ണത്തില്‍ ഗണ്യമായ കുറവുണ്ടായിട്ടുണ്ട്. പുതുക്കലിന് മുന്‍പ് 2,78,50,855 ആയിരുന്ന വോട്ടര്‍മാരുടെ എണ്ണം 9,06,211 പേര്‍ കുറഞ്ഞ് 2,69,44,644 ആയി മാറി. ഗോവയില്‍ 11,85,034 ല്‍ നിന്ന് 10,57,566 (1,27,468) ആയി കുറഞ്ഞു. 

കേന്ദ്രഭരണ പ്രദേശങ്ങളില്‍, ആന്‍ഡമാന്‍ നിക്കോബാര്‍ ദ്വീപുകളില്‍ വോട്ടര്‍മാരുടെ എണ്ണം 3,10,404 ല്‍ നിന്ന് 2,58,040 ആയി (52,364), പുതുച്ചേരിയില്‍ 10,21,578 ല്‍ നിന്ന് 9,44,211 ആയി (77,367), ലക്ഷദ്വീപില്‍ 57,813 ല്‍ നിന്ന് 57,607 ആയി (206) കുറഞ്ഞു.

ALSO READ: വന്ദേമാതരം: കേന്ദ്ര ഉത്തരവ് നാഗാലാൻഡിൽ നടപ്പിലാക്കില്ലെന്ന് നാഗ സ്റ്റുഡന്റ്‌സ് ഫെഡറേഷൻ; വടക്കുകിഴക്കൻ സംസ്ഥാനങ്ങളിൽ പ്രതിഷേധം

മരണം, സ്ഥിരമായി താമസം മാറി കൊണ്ടിരിക്കല്‍, ഒന്നിലധികം സ്ഥലങ്ങളില്‍ വോട്ടര്‍ പട്ടികയില്‍ പേര് വരിക, മറ്റ് അയോഗ്യതകള്‍ എന്നിവയാണ് വോട്ടര്‍മാരെ ഒഴിവാക്കാന്‍ കാരണമായി അധികൃതര്‍ ചൂണ്ടിക്കാട്ടുന്നത്. പുതിയ വോട്ടര്‍മാരെ ചേര്‍ത്തതിന് ശേഷമുള്ള അന്തിമ കണക്കാണിത്. വോട്ടര്‍ പട്ടിക പുതുക്കല്‍ ഒരു തുടര്‍ച്ചയായ പ്രക്രിയയാണ്. അര്‍ഹരായ പൗരന്മാര്‍ക്ക് ഇപ്പോഴും പേര് ചേര്‍ക്കാനും തിരുത്തലുകള്‍ വരുത്താനും അവസരമുണ്ടെന്നും തെരഞ്ഞെടുപ്പ് കമ്മീഷന്‍ അറിയിച്ചു. 

പശ്ചിമ ബംഗാള്‍, ഉത്തര്‍പ്രദേശ്, തമിഴ്നാട് എന്നീ സംസ്ഥാനങ്ങളിലെ പുതുക്കിയ പട്ടിക ഈ മാസം അവസാനം പുറത്തുവിടുന്നുണ്ട്. രാജ്യവ്യാപകമായി നടക്കുന്ന ഈ ശുദ്ധീകരണ പ്രക്രിയയുടെ അടുത്ത ഘട്ടം ഏപ്രില്‍ മാസത്തില്‍ ആരംഭിക്കുമെന്നും തെരഞ്ഞെടുപ്പ് കമീഷന്‍ അറിയിച്ചു. 

special intensive revision of voter lists completed in six states and union territories, with millions of ineligible voters removed. gujarat saw the highest deletions, election commission said.