കോഴിക്കോട്:   രോഗിയെ എത്തിച്ചുകൊടുക്കുന്ന ആംബുലന്‍സ് ഡ്രൈവര്‍ക്ക് കൊച്ചിയിലെ സ്വകാര്യ ആശുപത്രി, ഒരാള്‍ക്ക് പതിനായിരം രൂപ എന്ന കണക്കില്‍ കമ്മീഷന്‍ നല്‍കുന്നുവെന്ന ആരോഗ്യമന്ത്രി വീണ ജോര്‍ജിന്റെ പ്രസംഗം മന്ത്രിക്ക് തന്നെ വിനയാകുന്നു.  മന്ത്രിയുടെ പ്രസംഗം സമൂഹമാധ്യമങ്ങളില്‍ ചര്‍ച്ചയായതോടെ മന്ത്രിക്കെതിരെ വിമര്‍ശനം ഉയരുകയാണ്. ഇത്രയും ഗുരുതരമായ വെളിപ്പെടുത്തല്‍ അറിഞ്ഞിട്ടും എന്ത് നടപടിയാണ് ആരോഗ്യമന്ത്രി സ്വീകരിച്ചതെന്നാണ് ചോദ്യമുയരുന്നത്.

വിമര്‍ശനവുമായി പ്രതിപക്ഷ നേതാവ് വിഡി സതീശനും രംഗത്തെത്തി. 'പ്രതിപക്ഷമാണോ ആംബുലന്‍സ് ലോബിയെ നിയന്ത്രിക്കേണ്ടത്? അതില്‍ നടപടിയെടുക്കേണ്ടത് സര്‍ക്കാരാണ്. പ്രസംഗിക്കുകയല്ല വേണ്ടത്' എന്നായിരുന്നു പ്രതിപക്ഷ നേതാവിന്റെ പ്രതികരണം. 

ഇന്നലെ കോഴഞ്ചേരിയില്‍ നടത്തിയ പൊതുപരിപാടിയിലായിരുന്നു മന്ത്രിയുടെ വെളിപ്പെടുത്തല്‍. ഡോക്ടര്‍മാര്‍ തന്നോട് പറഞ്ഞതാണ് ഇക്കാര്യമെന്നാണ് മന്ത്രി പ്രസംഗത്തില്‍ പറഞ്ഞത്.

'ആംബുലന്‍സ് ഡ്രൈവര്‍മാര്‍ക്ക് തിരുവനന്തപുരത്തെ ആശുപത്രികള്‍ അയ്യായിരം രൂപ വരെ നല്‍കുന്നുണ്ട്. പത്ത് രോഗികളെ എത്തിച്ചാല്‍ ആംബുലന്‍സ് ഡ്രൈവര്‍മാര്‍ക്ക് 50000 രൂപ ലഭിക്കും. രോഗികളുടെ ബില്ലില്‍ നിന്നാണ് ആശുപത്രികള്‍ ഈ തുക തിരിച്ച് ഈടാക്കുന്നതെന്നും. കേരളത്തിന്റെ ആരോഗ്യ മേഖലയിലേക്ക് സ്വകാര്യ ആശുപത്രികളില്‍ വന്‍തോതില്‍ നിക്ഷേപം നടത്തിയത് ആഗോള മരുന്ന് കമ്പനികളാണ്. 80 ഉം 90 ഉം ശതമാനം ഓഹരി നിക്ഷേപം നടത്തിയ ഈ കമ്പനികള്‍ മറ്റ് സംസ്ഥാനങ്ങളില്‍ ബെഡ് ഒന്നിന് ഒന്നര കോടി രൂപയാണ് നിക്ഷേപം നടത്തിയത്.' എന്നാല്‍ കേരളത്തില്‍ രണ്ടര കോടി രൂപയാണ് ഇവര്‍ നിക്ഷേപിച്ചിരിക്കുന്നതെന്നും ആരോഗ്യമന്ത്രി പറഞ്ഞു.

 A statement by Kerala Health Minister Veena George that a private hospital in Kochi pays ambulance drivers a commission of ₹10,000 per patient has sparked controversy, putting the minister herself in a difficult position.