മുംബൈ: ഇന്ത്യൻ ക്രിക്കറ്റിൽ നിർണ്ണായക അഴിച്ചുപണികൾക്കൊരുങ്ങി ബിസിസിഐ. ചീഫ് സെലക്ടർ അജിത് അഗാർക്കറുടെ കാലാവധി 2027 ഏകദിന ലോകകപ്പ് വരെ നീട്ടാൻ ബോർഡ് തീരുമാനിച്ചതായാണ് പുതിയ റിപ്പോർട്ടുകൾ. അതേസമയം, ടി20 ക്യാപ്റ്റൻ സൂര്യകുമാർ യാദവിന്റെ ബാറ്റിംഗ് ഫോമിലെ ഇടിവ് ടീമിലെ അദ്ദേഹത്തിന്റെ സ്ഥാനത്തിന് ഭീഷണിയാകുന്നു.

അഗാർക്കറിൽ വിശ്വാസമർപ്പിച്ച് ബിസിസിഐ

2026 ജൂണിൽ അഗാർക്കറുടെ നിലവിലെ കരാർ അവസാനിക്കാനിരിക്കെയാണ് ഒരു വർഷം കൂടി കാലാവധി നീട്ടി നൽകാൻ ബോർഡ് തീരുമാനിച്ചത്. അഗാർക്കറുടെ കീഴിൽ ടീം ഇന്ത്യ കൈവരിച്ച ഐസിസി കിരീട നേട്ടങ്ങളാണ് ഈ തീരുമാനത്തിന് പിന്നിൽ.

2024 ടി20 ലോകകപ്പ്, 2025 ചാമ്പ്യൻസ് ട്രോഫി, 2026 ടി20 ലോകകപ്പ് എന്നിങ്ങനെ തുടർച്ചയായ മൂന്ന് ഐസിസി ട്രോഫികൾ ഇന്ത്യ നേടിയത് അഗാർക്കറുടെ കാലത്താണ്.

സീനിയർ താരങ്ങളിൽ നിന്ന് യുവതാരങ്ങളിലേക്കുള്ള ടീമിന്റെ മാറ്റം സുഗമമായി നടപ്പിലാക്കാൻ അഗാർക്കറുടെ ധീരമായ തീരുമാനങ്ങൾ സഹായിച്ചുവെന്ന് ബിസിസിഐ വിലയിരുത്തുന്നു. ഐപിഎൽ മത്സരങ്ങൾക്കിടെ ഇത് സംബന്ധിച്ച ഔദ്യോഗിക ചർച്ചകൾ നടക്കും.

സൂര്യകുമാറിന് വെല്ലുവിളിയായി ബാറ്റിംഗ് ഫോം

രണ്ടാം ടി20 ലോകകപ്പ് കിരീടത്തിലേക്ക് ഇന്ത്യയെ നയിച്ചെങ്കിലും, ക്യാപ്റ്റൻ സൂര്യകുമാർ യാദവിന്റെ വ്യക്തിഗത പ്രകടനം സെലക്ടർമാരെ ആശങ്കപ്പെടുത്തുന്നുണ്ട്. 2028-ലെ ലോസ് ഏഞ്ചൽസ് ഒളിമ്പിക്സിലും ഓസ്‌ട്രേലിയയിൽ നടക്കുന്ന ടി20 ലോകകപ്പിലും സൂര്യകുമാർ ഉണ്ടാകുമോ എന്ന കാര്യത്തിൽ ഇപ്പോൾ അനിശ്ചിതത്വം നിലനിൽക്കുകയാണ്.

2025-ൽ സ്ട്രൈക്ക് റേറ്റ് 120-ന് താഴേക്ക് പോയ സൂര്യകുമാറിന് ഒരു അർദ്ധ സെഞ്ച്വറി പോലും നേടാനായില്ല. 2026 ലോകകപ്പിന്റെ തുടക്കത്തിൽ ഫോമിലേക്ക് തിരിച്ചെത്തിയെങ്കിലും നിർണ്ണായക മത്സരങ്ങളിൽ പരാജയപ്പെട്ടു.സെമി ഫൈനലിൽ ഇംഗ്ലണ്ടിനെതിരെ 11 റൺസും ന്യൂസിലൻഡിനെതിരായ ഫൈനലിൽ പൂജ്യത്തിനും സൂര്യ പുറത്തായിരുന്നു.

ജൂൺ-ജൂലൈ മാസങ്ങളിൽ നടക്കുന്ന ഇംഗ്ലണ്ട്, അയർലൻഡ് പര്യടനങ്ങൾ സൂര്യകുമാറിന് അഗ്നിപരീക്ഷയാകും. ക്യാപ്റ്റൻസിയെക്കാൾ ഉപരി അദ്ദേഹത്തിന്റെ ബാറ്റിംഗ് മികവായിരിക്കും സെലക്ഷൻ കമ്മിറ്റി പ്രധാനമായും നിരീക്ഷിക്കുക.

ഗംഭീർ-സൂര്യ സഖ്യം തുടരുമോ?

മുഖ്യ പരിശീലകൻ ഗൗതം ഗംഭീർ 2028 വരെ കരാർ നീട്ടിക്കിട്ടുമെന്ന് പ്രതീക്ഷിക്കുമ്പോൾ, അദ്ദേഹത്തിന്റെ പ്രിയപ്പെട്ട നായകനായ സൂര്യകുമാറിനെ അജിത് അഗാർക്കറുടെ കമ്മിറ്റി പിന്തുണയ്ക്കുമോ എന്നത് വരും മത്സരങ്ങളെ അടിസ്ഥാനമാക്കിയായിരിക്കും. ഒളിമ്പിക്സ് സമയത്ത് സൂര്യകുമാറിന് 38 വയസ്സ് തികയുമെന്നതും വൈഭവ് സൂര്യവംശിയെപ്പോലെയുള്ള യുവതാരങ്ങളുടെ സാന്നിധ്യവും സെലക്ടർമാരുടെ ചിന്തകളെ സ്വാധീനിക്കുന്നുണ്ട്.