കണ്ണൂർ: അഞ്ചരക്കണ്ടി മെഡിക്കൽ കോളേജ് ഭൂമി ഏറ്റെടുക്കുന്നതുമായി ബന്ധപ്പെട്ട് കണ്ണൂർ താലൂക്ക് ലാൻഡ് ബോർഡ് പുറപ്പെടുവിച്ച ഉത്തരവ് വിവാദമാകുന്നു. കോടികൾ പ്രതിഫലം പറ്റി ഭൂമി കൈമാറ്റം ചെയ്ത മർക്കസിനെ നടപടികളിൽ നിന്ന് ഒഴിവാക്കി, കാലങ്ങൾക്കു മുൻപേ രാജ്യം വിട്ടുപോയ ബ്രിട്ടീഷുകാർക്കെതിരെ കേസെടുക്കാനാണ് ലാൻഡ് ബോർഡിന്റെ വിചിത്രമായ നിർദ്ദേശം.

1964-ൽ ഭൂമി കൈമാറ്റത്തിന് ഒപ്പിട്ടു നൽകിയ മാർജറി ഗ്രേസ്, ഒഹലോറൻ എന്നീ ബ്രിട്ടീഷ് വംശജർക്കെതിരെ നിയമവിരുദ്ധ ഇടപാടുകൾക്ക് കേസെടുക്കാനാണ് ബോർഡ് ശുപാർശ ചെയ്തത്. പവർ ഓഫ് അറ്റോർണി ഉപയോഗിച്ച് കോടികൾ കൈപ്പറ്റി ഭൂമി വിറ്റ മർക്കസിനെതിരെ ഉത്തരവിൽ പരാമർശമില്ല. മർക്കസിന്റെ കൈവശമുള്ള മിച്ചഭൂമി കണക്കാക്കണമെന്ന 2024 ഓഗസ്റ്റിലെ ഹൈക്കോടതി നിർദ്ദേശം ലാൻഡ് ബോർഡ് അവഗണിച്ചതായാണ് സൂചന. മെഡിക്കൽ കോളേജ് സ്ഥിതി ചെയ്യുന്ന 218 ഏക്കറോളം ഭൂമി അനധികൃതമായി കൈവശം വെച്ച മിച്ചഭൂമിയാണെന്നും ഇത് കണ്ടുകെട്ടണമെന്നും ഇടക്കാല ഉത്തരവിൽ പറയുന്നു.

ALSO READ: വാൽപാറ റോഡ് നിർമ്മാണത്തിൽ വൻ പിഴവ്: സുരക്ഷാ പാളിച്ചകൾ അക്കമിട്ടു നിരത്തി മോട്ടർ വാഹന വകുപ്പ്; റിപ്പോർട്ട് ഇന്ന് സർക്കാരിന് സമർപ്പിക്കും

മാട്ടൂൽ സ്വദേശി ജബ്ബാർ ഹാജിയുടെ പ്രസ്റ്റീജ് എജുക്കേഷൻ ട്രസ്റ്റ് വാങ്ങിയ 200 ഏക്കറോളം ഭൂമിയിലാണ് നിലവിൽ കോളേജ് പ്രവർത്തിക്കുന്നത്. രണ്ടത്തറ എസ്റ്റേറ്റ്, എസൻഷ്യൽ ഓയിൽ കമ്പനി എന്നിവയുടെ ഉടമസ്ഥതയിലായിരുന്ന തോട്ടഭൂമി (കറപ്പത്തോട്ടം), 2006-ൽ 'ഗാർഡൻ എ' എന്ന പദവിയിലേക്ക് മാറ്റിയാണ് മറ്റ് ആവശ്യങ്ങൾക്കായി ഉപയോഗിച്ചത്. ഈ കൈമാറ്റം നിയമവിരുദ്ധമാണെന്നാണ് ലാൻഡ് ബോർഡിന്റെ കണ്ടെത്തൽ.

"യഥാർഥ ഗുണഭോക്താക്കളെ സംരക്ഷിക്കാനും നടപടികൾ അട്ടിമറിക്കാനുമാണ് കണ്ടെത്താൻ കഴിയാത്ത ബ്രിട്ടീഷുകാരെ പ്രതിപട്ടികയിൽ ഉൾപ്പെടുത്തിയതെന്ന ആക്ഷേപം ശക്തമാണ്."

ഭൂമി ഇടപാടിലെ ക്രമക്കേടുകൾ പുറത്തുവന്നതോടെ മെഡിക്കൽ കോളേജിന്റെ ഭാവി പ്രതിസന്ധിയിലായിരിക്കുകയാണ്. ഹൈക്കോടതിയിൽ നിന്ന് വിധി എതിരായാൽ കോളേജ് അടച്ചുപൂട്ടേണ്ടി വരുമെന്ന ഭീതിയിലാണ് വിദ്യാർഥികൾ. അഞ്ചരക്കണ്ടി ഡെന്റൽ കോളേജ് വിദ്യാർഥി നിതിൻ രാജിന്റെ ആത്മഹത്യയെത്തുടർന്ന് നടന്ന അന്വേഷണങ്ങളാണ് ഈ ഭൂമി ഇടപാടുകളിലെ കള്ളത്തരങ്ങൾ വെളിച്ചത്തുകൊണ്ടുവന്നത്.

നിലവിൽ ലാൻഡ് ബോർഡ് കൈമാറ്റങ്ങൾ റദ്ദാക്കിയതോടെ, കോളേജ് ഉൾപ്പെടുന്ന ഭൂമിയുടെ നിയമസാധുത പൂർണ്ണമായും നഷ്ടപ്പെട്ടിരിക്കുകയാണ്. വരും ദിവസങ്ങളിൽ സ്റ്റേറ്റ് ലാൻഡ് ബോർഡിന്റെയും ഹൈക്കോടതിയുടെയും നിലപാട് ഈ വിഷയത്തിൽ നിർണ്ണായകമാകും.

The Thaluk Land Board has issued a controversial order to reclaim nearly 218 acres of land occupied by the Anjarakkandy Medical College in Kannur, labeling it as illegal surplus land. In a move described as "bizarre," the board recommended filing cases against the former British owners, Marjorie Grace and O'Halloran, who signed the transfer documents back in 1964.