കോഴിക്കോട്: കനത്ത ചൂടില്‍ നാടും നഗരവും പൊള്ളുമ്പോള്‍ ജനം ആശ്വാസം തേടുന്നത് പഴങ്ങളിലാണ്. വേനല്‍ കടുത്തതോടെ ശരീരത്തിലെ നിര്‍ജലീകരണം തടയാന്‍ പഴങ്ങള്‍ക്കും ജലാംശം കൂടുതലുള്ള പച്ചക്കറികള്‍ക്കും ആവശ്യക്കാരേറെയാണെങ്കിലും, ചൂടിനൊപ്പം വിലയും ഉയരുന്നത് ഉപഭോക്താക്കളെ വലയ്ക്കുന്നു.

വേനലില്‍ മനസ്സും ശരീരവും തണുപ്പിക്കാന്‍ കുട്ടികളും മുതിര്‍ന്നവരും ഒരുപോലെ ആശ്രയിക്കുന്നത് പഴങ്ങളെയും നാരങ്ങാവെള്ളത്തെയുമാണ്. നിലവില്‍ വിപണിയില്‍ ഏറ്റവുമധികം പ്രിയം മാമ്പഴത്തിനാണ്. ഗുണനിലവാരമനുസരിച്ച് 100 രൂപ മുതല്‍ 200 രൂപ വരെയാണ് മാമ്പഴത്തിന് ഈടാക്കുന്നത്. ഇതോടൊപ്പം നാട്ടുമാങ്ങകളും വിപണിയില്‍ ധാരാളമായുണ്ട്.

ദാഹശമനത്തിന് ഏറ്റവും കൂടുതല്‍ പേര്‍ വാങ്ങുന്ന തണ്ണിമത്തന്റെ വിലയും മുകളിലേക്കാണ്. സാധാരണ തണ്ണിമത്തന് പുറമെ കിലോയ്ക്ക് 38 രൂപ നിരക്കില്‍ മഞ്ഞ വത്തക്കയ്ക്കും ആവശ്യക്കാരുണ്ട്. 

ആരോഗ്യഗുണങ്ങള്‍ കണക്കിലെടുത്ത് പപ്പായ വാങ്ങുന്നവരും കുറവല്ല. കിലോയ്ക്ക് 40 രൂപയാണ് ഇതിന്റെ വില. മറ്റ് പ്രധാന പഴവര്‍ഗങ്ങളുടെ വിലയും വിപണിയില്‍ ഉയര്‍ന്നുതന്നെയാണ് നില്‍ക്കുന്നത്. കിലോയ്ക്ക് 190 രൂപയുള്ള ആപ്പിളാണ് വിലയില്‍ മുന്നില്‍. ഡ്രാഗണ്‍ ഫ്രൂട്ട് 100 രൂപയ്ക്കും, സപ്പോട്ട 65 രൂപയ്ക്കും വിപണിയില്‍ ലഭ്യമാണ്. പൈനാപ്പിള്‍ (60 രൂപ), പേരക്ക (55 രൂപ), സലാഡുകള്‍ക്കായി ഉപയോഗിക്കുന്ന കക്കിരി (35 രൂപ) എന്നിങ്ങനെയാണ് മറ്റ് വിലനിലവാരങ്ങള്‍.

ദിവസേന വില വര്‍ധിച്ചുകൊണ്ടിരിക്കുന്ന ചെറുനാരങ്ങയാണ് സാധാരണക്കാരെ ഏറ്റവും കൂടുതല്‍ ബുദ്ധിമുട്ടിക്കുന്നത്. നാരങ്ങാവെള്ളത്തിന് ഡിമാന്‍ഡ് ഏറിയതോടെ വിപണിയില്‍ ഇതിന് ക്ഷാമവും അനുഭവപ്പെടുന്നുണ്ട്. ചൂട് ഇനിയും കൂടുമെന്ന സൂചനകള്‍ക്കിടെ പഴവിപണി കൂടുതല്‍ സജീവമാകാനാണ് സാധ്യത.

Amid soaring temperatures, demand for fruits has significantly increased in markets as people look for refreshing and hydrating options. The surge in demand has also led to a noticeable rise in prices, putting pressure on consumers during the intense summer heat.