പൂച്ചാക്കല്‍: കേന്ദ്ര ഊര്‍ജ മന്ത്രാലയത്തിന്റെ നേതൃത്വത്തില്‍ നടപ്പാക്കുന്ന പള്ളിപ്പുറത്തെ ദേശീയ ഊര്‍ജ പരിശീലന കേന്ദ്രത്തിന്റെ നിര്‍മാണ പ്രവര്‍ത്തനങ്ങള്‍ക്ക് തുടക്കം കുറിച്ചു.
പവ്വര്‍ ഗ്രിഡ് കോര്‍പ്പറേഷന്‍ നേതൃത്വത്തിലാണ് നിര്‍മാണം തുടങ്ങിയത്. അടിത്തറ നിര്‍മാണത്തിന് തുടക്കമിട്ടു.പതിനഞ്ച് ഏക്കറിലാണ് പരിശീലന കേന്ദ്രം നിര്‍മിക്കുന്നത്. ആധുനിക ക്ലാസ് ഓഫിസ് ലാബ് മുറികള്‍, പ്രായോഗിക പരിശീലന കേന്ദ്രങ്ങള്‍, കളിസ്ഥലം, ചുറ്റുമതില്‍, അതിഥി മന്ദിരം, ഹോസ്റ്റല്‍, കന്റീന്‍ തുടങ്ങിയവയാണ് ഇതിലുണ്ടാകുക.നിരവധി തൊഴിലവസരങ്ങളുളള ഊര്‍ജ മാനേജ്‌മെന്റ്, ഊര്‍ജ എന്‍ജിനിയറിങ് വിഭാഗങ്ങളിലെ ഡിപ്‌ളോമ, ബിദുദം, ബിരുദാനന്തര ബിരുദ കോഴ്‌സുകളാണ് ഇവിടെയുണ്ടാകുക.
ആകെ പതിമൂന്ന് കോഴ്‌സുകളിലായി ആയിരത്തില്‍പ്പരം വിദ്യാര്‍ഥികള്‍ക്ക് പഠന സൗകര്യമുണ്ടാകും.രാജ്യത്തെ പത്താമത്തേയും സംസ്ഥാനത്തെ ആദ്യത്തേയുമാണ് പള്ളിപ്പുറത്തെ കേന്ദ്രം.
ആലപ്പുഴ ആസ്ഥാനമായ സ്‌കില്‍ഡേഴ്‌സ് ഡെവലപേഴ്‌സ്, ഡല്‍ഹി ആസ്ഥാനമായ കശ്യാപ് ഇന്‍ഫാ എന്നി കമ്പനികള്‍ സംയുക്തമായാണ് കെട്ടിട നിര്‍മാണം കരാര്‍ എടുത്തിരിക്കുന്നത്. 67 കോടി രൂപയ്ക്കാണ് കരാര്‍. പതിനാല് മാസത്തിനുള്ളില്‍ നിര്‍മാണം പൂര്‍ത്തിയാക്കും.
പവ്വര്‍ ഗ്രിഡ് കോര്‍പ്പറേഷന്‍ എക്‌സിക്യൂട്ടിവ് ഡയറക്ടര്‍ ആര്‍.കെ. സിങ്, ജനറല്‍ മാനേജര്‍മാരായ രവീന്ദ്രകുമാര്‍, ഹജ്കുമാര്‍, ഡല്‍ഹി ആസ്ഥാന ക്യാംപ് ഇന്‍ഫാ എം.ഡി കെ.കെ. ഉപാധ്യ, സ്‌കില്‍ഡേഴ്‌സ് ഡവലപേഴ്‌സ് എം.ഡി ശ്യംരാജ് തുടങ്ങിയവര്‍ ചടങ്ങുകളില്‍ പങ്കെടുത്തു. മുന്‍ കേന്ദ്രമന്ത്രിയും എം.പിയുമായ കെ.സി. വേണുഗോപാലിന്റെ ശ്രമഫലമായാണ് പരിശീലന കേന്ദ്രം പള്ളിപ്പുറത്തിനു ലഭിച്ചത്.
2014 ഫെബ്രുവരി പതിനെട്ടിന് മുന്‍ മുഖ്യമന്ത്രി ഉമ്മന്‍ ചാണ്ടി ശിലാസ്ഥാപനം നടത്തിയിരുന്നു.
സാങ്കേതിക പ്രശ്‌നങ്ങളെ തുടര്‍ന്ന് രണ്ടരവര്‍ഷത്തോളം വൈകിയ കെട്ടിട നിര്‍മാണത്തിനാണ് ഇപ്പോള്‍ തുടക്കം കുറിച്ചിരിക്കുന്നത്.