കൂനൂര്‍: സ്വകാര്യ തേയില തോട്ടത്തിലെ നിര്‍മാണത്തിലിരുന്ന ചുറ്റുമതില്‍ തകര്‍ന്ന് നാല് തൊഴിലാളികള്‍ മരിച്ചു. നീലഗിരി ജില്ലയിലെ കൂന്നൂരില്‍ നിന്നും എട്ട് കിലോമീറ്റര്‍ ദൂരെയുള്ള മണിച്ചോലയിലെ സ്വകാര്യ എസ്‌റ്റേറ്റില്‍ ഇന്നലെ രാവിലെ 11നായിരുന്നു അപകടം.
തമിഴ്‌നാട് ധര്‍മപുരി ജില്ലയിലെ അരൂര്‍ സ്വദേശികളായ ആറുമുഖം(48), മകന്‍ പ്രതാപ്(20), കാമരാജ്(22), കാര്‍ത്തികേയന്‍(26) എന്നിവരാണ് മരിച്ചത്. മറ്റൊരു തൊഴിലാളി ജനഗര്‍(22) കോയമ്പത്തുര്‍ മെഡിക്കല്‍ കോളജില്‍ ചികിത്സയിലാണ്. ചുറ്റുമതിലിന്റെ താഴ്ഭാഗത്തെ മരം മുറിച്ചതിന് ശേഷം മരത്തിന്റെ വേരുകള്‍ മതിലിന് താഴ്ഭാഗത്ത് നിന്നും എടുത്തുമാറ്റിയതോടെ നിര്‍മ്മാണത്തിലിരുന്ന ചുറ്റുമതിലും മണ്ണുമുള്‍പ്പടെ ഇവരുടെ ശരീരത്തിലേക്ക് വീഴുകയായിരുന്നു. നീലഗിരി ജില്ലാ കലക്ടര്‍ പി ശങ്കരന്‍,എസ്.പി മുരളി റംബ,  ആര്‍.ഡി.ഒ ഗീതപ്രിയ, ഡി.ആര്‍.ഒ ഭാസ്‌കര പാണ്ഡ്യന്‍ എന്നിവര്‍ സ്ഥലം സന്ദര്‍ശിച്ചു. പൊലിസ് അന്വേഷണം ആരംഭിച്ചു.