പനാജി: ഈവര്‍ഷം നടക്കുന്ന ഗോവ നിയമ സഭാ തെരഞ്ഞെടുപ്പില്‍ മത്സരിക്കാന്‍ പൂര്‍ണ സജ്ജമെന്ന് ബി.ജെ.പി. 40 നിയമസഭാ സീറ്റുള്ള സംസ്ഥാനത്തെ 37 സീറ്റുകളിലേക്കും മത്സരിക്കാന്‍ പാര്‍ട്ടി തയാറെടുത്തു കഴിഞ്ഞുവെന്നും ബി.ജെ.പി സംസ്ഥാന ജന.സെക്രട്ടറി സദാനന്ദ തന്‍വാദെ അറിയിച്ചു.
സംസ്ഥാനത്തെ 35 നിയമസഭാ മണ്ഡലങ്ങളിലും പാര്‍ട്ടി സംഘടിപ്പിച്ച സങ്കല്‍പ യാത്ര ശുഭപ്രതീക്ഷയാണ് നല്‍കുന്നത്. സംസ്ഥാനത്ത് 37 സീറ്റുകളില്‍ ആരുമായും സഖ്യത്തിന് ഒരുക്കമല്ലെന്നും ശേഷിക്കുന്ന മൂന്ന് സീറ്റുകളില്‍ സഖ്യമാകാമെന്നുമാണ് പാര്‍ട്ടി നേതൃത്വം പറയുന്നത്.
ഇതിനിടയില്‍ മഹാരാഷ്ട്ര ഗോമന്ദക് പാര്‍ട്ടിയും(എം.ജി.പി) ആര്‍.എസ്.എസ് വിമതനായ സുഭാഷ് വെളിങ്കരയുടെ പാര്‍ട്ടിയായ ഗോവ സുരക്ഷാ മഞ്ചും സഖ്യത്തില്‍ മത്സരിക്കാന്‍ തീരുമാനിച്ച സാഹചര്യത്തില്‍ എം.ജി.പിയുമായുള്ള എല്ലാ ബന്ധങ്ങളും അവസാനിപ്പിച്ചതായും ബി.ജെ.പി ജന.സെക്രട്ടറി അറിയിച്ചു.