പറവൂര്‍: റവന്യൂ ജില്ലാ സ്‌കൂള്‍ കലോത്സവത്തില്‍ കൈക്കൂലി ആവശ്യപ്പെട്ട വിധികര്‍ത്താവിനെ ജില്ലാ വിദ്യാഭ്യാസ ഓഫിസര്‍ കുടുക്കി. മത്സരാര്‍ഥികളെ വിജയിപ്പിക്കാന്‍ നാലുലക്ഷം രൂപ കൈക്കൂലി ആവശ്യപ്പെട്ട നൃത്തവിഭാഗത്തിലെ വിധികര്‍ത്താവ് കണ്ണൂര്‍ സ്വദേശി ജയരാജിനെയാണ് പുറത്താക്കിയത്. ഇദ്ദേഹത്തിനൊപ്പമുണ്ടായിരുന്ന മറ്റു മൂന്നു വിധികര്‍ത്താക്കളെയും ഒഴിവാക്കിയിട്ടുണ്ട്. മത്സരാര്‍ഥികളോട് പണം ആവശ്യപ്പെടുന്നതായി വിവരം ലഭിച്ചതിനെതുടര്‍ന്ന്  ജില്ലാ വിദ്യാഭ്യാസ ഓഫിസര്‍ സി.എ സന്തോഷ് മത്സരാര്‍ഥിയുടെ രക്ഷിതാവെന്ന വ്യാജേന ഇയാളെ  ഫോണില്‍ വിളിച്ചു. എട്ട് മത്സരങ്ങളില്‍ താന്‍ വിധികര്‍ത്താവായി വരുമെന്നും എല്ലാ ഇനത്തിലും ഒന്നാം സ്ഥാനം രേഖപ്പെടുത്താമെന്നുമായിരുന്നു ഫോണില്‍ ഇയാള്‍ പറഞ്ഞത്. നാല് ലക്ഷം രൂപയാണ് ഇതിനായി ആവശ്യപ്പെട്ടത്. പണം ആലുവ റെയില്‍വേ സ്റ്റേഷനില്‍ എത്തിക്കാനും ആവശ്യപ്പെട്ടു. സംസാരം ജില്ലാ വിദ്യാഭ്യാസ ഓഫിസര്‍ റെക്കോര്‍ഡ് ചെയ്തു. പിന്നീട് ഇന്നലെ രാവിലെ കലോത്സവ വേദിയിലെ വിധികര്‍ത്താക്കളുടെ മുറിയിലെത്തിയ ഇയാളെ മുനിസിപ്പല്‍ ചെയര്‍മാന്‍ രമേഷ് ഡി.കുറുപ്പും ഡി.ഡി.ഇയും മറ്റു സംഘാടകസമിതി അംഗങ്ങളും ചേര്‍ന്നു കൈയോടെ പിടികൂടുകയായിരുന്നു.