കൊണ്ടോട്ടി: റമദാന്‍ അടുത്തതോടെ കേരളത്തില്‍ നിന്നുള്ള ഉംറ തീര്‍ഥാടകരുടെ എണ്ണത്തില്‍ വന്‍ വര്‍ധന. പരിശുദ്ധമായ റമദാന്‍ മാസത്തില്‍ മക്കയില്‍ കഴിയുന്നതിനാണ് തീര്‍ഥാടകര്‍ യാത്രയാകുന്നത്. റമദാന്‍ പകുതിയാകുന്നതോടെ ഈ വര്‍ഷത്തെ ഉംറ വിസകള്‍ സഊദി നിര്‍ത്തിവയ്ക്കും. റമദാന് ശേഷം സഊദി ഹജ്ജ് തീര്‍ഥാടനത്തിനാണ് അനുമതി നല്‍കുക.
മലബാറില്‍ നിന്നുളള ഉംറ തീര്‍ഥാടകര്‍ ഏറെയും നെടുമ്പാശ്ശേരി വിമാനത്താവളം വഴിയാണ് യാത്രയാകുന്നത്. കരിപ്പൂരില്‍ നിന്ന് നേരിട്ട് ജിദ്ദയിലേക്ക് വിമാനമില്ലാത്തതിനാലാണിത്. എന്നാല്‍ കരിപ്പൂരില്‍ നിന്ന് യു.എ.ഇ ഉള്‍പ്പെടെയുളള രാജ്യങ്ങള്‍ വഴി സഊദിയിലേക്കുളള കണക്ഷന്‍ വിമാനങ്ങളിലും തീര്‍ഥാടകര്‍ പുറപ്പെടുന്നുണ്ട്. മുന്‍കാലങ്ങളെ അപേക്ഷിച്ച് ഇത്തവണ കുടംബസമേതം ഉംറ തീര്‍ഥാടനത്തിന് പോകുന്നവരുടെ എണ്ണം വര്‍ധിച്ചിട്ടുണ്ട്. അറബിമാസം റബീഉുല്‍ അവ്വല്‍ മുതലാണ് ഉംറ തീര്‍ഥാടന വിസകള്‍ സഊദി അനുവദിച്ചു തുടങ്ങിയത്.