തിരുവനന്തപുരം: യാഥാര്‍ഥ്യവുമായി പൊരുത്തപ്പെടാത്ത കേന്ദ്ര ബജറ്റ് കേരളത്തെ പാടെ അവഗണിക്കുകയാണ് ചെയ്തിരിക്കുന്നതെന്ന് പ്രതിപക്ഷ നേതാവ് രമേശ് ചെന്നിത്തല. കേന്ദ്രം 2015ല്‍ ഉറപ്പ് നല്‍കിയ എയിംസ് ഇത്തവണയും കേരളത്തിന് നിഷേധിച്ചതിന് ഒരു നീതീകരണവുമില്ല. നോട്ട് പ്രതിസന്ധി മൂലം തകര്‍ന്ന സമ്പദ്‌വ്യവസ്ഥയെ കരകയറ്റാനുള്ള ക്രിയാത്മക നിര്‍ദേശങ്ങളൊന്നും അരുണ്‍ ജയ്റ്റിലി മുന്നോട്ട് വയ്ക്കുന്നില്ല. പുതിയ ക്ഷേമപദ്ധതികളൊന്നും പ്രഖ്യാപിച്ചിട്ടുമില്ല. നോട്ട് പരിഷ്‌ക്കരണം മൂലം തകര്‍ന്ന കേരളത്തിന്റെ സഹകരണ മേഖലയെ രക്ഷിക്കാനുള്ള പദ്ധതികളൊന്നും പ്രഖ്യാപിച്ചിട്ടില്ല. നികുതിദായകര്‍ക്ക് വന്‍ഇളവുകള്‍ നല്‍കുമെന്നാണ് പ്രചരിക്കപ്പെട്ടിരുന്നതെങ്കിലും നാമമാത്രമായ ആശ്വാസമേ അവര്‍ക്ക് ലഭിച്ചുള്ളൂ. റെയില്‍ വികസനത്തിന്റെ കാര്യത്തിലും കേരളത്തിന് അവഗണന മാത്രമാണ് ബജറ്റില്‍ ലഭിച്ചിരിക്കുന്നത്. കേരളത്തിന്റെ ആവശ്യങ്ങളൊന്നും അംഗീകരിച്ചിട്ടില്ലെന്നും ചെന്നിത്തല പറഞ്ഞു.