വടകര: വൃക്ക രോഗികള്‍ക്ക് സൗജന്യ ഡയാലിസിസ് ചെയ്ത് നല്‍കുന്നതിനായി വടകര തണലിന്റെ ആഭിമുഖ്യത്തില്‍ ജനകീയ നിധി സമാഹരണം ഏപ്രില്‍ 8,9 തിയതികളിലായി നടത്തും. വടകര, കൊയിലാണ്ടി, പയ്യോളി മുനിസിപ്പാലിറ്റികളിലും 35ഓളം സമീപ പഞ്ചായത്തുകളിലുമാണ് നിധി സമാഹരണം നടത്തുക. 2011ല്‍ 10 ഡയാലിസിസ് മെഷീനുകളിലായി പ്രവര്‍ത്തനം തുടങ്ങിയ തണലില്‍ ഇപ്പോള്‍ 70 മെഷീനുകളിലായി 400ഓളം പേര്‍ക്ക് സൗജന്യ ഡയാലിസിസ് ചെയ്തുവരുന്നുണ്ട്. ഒന്നര വര്‍ഷത്തെ കാലയളവില്‍ 70,965 സൗജന്യ ഡയാലിസിസുകള്‍ ചെയ്തു. സൗജന്യമായാണ് 400 ലേറെ രോഗികള്‍ക്ക് ഡയാലിസിസ് നല്‍കുന്നത്.
2015 മെയ് 9,10 തിയതികളില്‍ പൊതുജനങ്ങളില്‍ നിന്നും സമാഹരിച്ച രണ്ടു കോടിയിലേറെ രൂപ ഉപയോഗിച്ചാണ് ഇത്രയും കാലം സൗജന്യ ഡയാലിസിസ് നല്‍കാന്‍ കഴിഞ്ഞതെന്ന് തണല്‍ സംഘാടകര്‍ പറഞ്ഞു. സൗജന്യ ഡയാലിസിസ് തുടര്‍ന്നും നല്‍കുന്നതിന് ജനകീയ വിഭവ സമാഹരണം നടത്താന്‍ വടകര ടൗണ്‍ഹാളില്‍ ചേര്‍ന്ന വടകര, കൊയിലാണ്ടി, പയ്യോളി മുനിസിപ്പാലിറ്റികളുടെയും 35ഓളം സമീപ പഞ്ചായത്തുകളിലെയും അധ്യക്ഷന്‍മാര്‍, മെമ്പര്‍മാര്‍, രാഷ്ട്രീയ പാര്‍ട്ടി പ്രതിനിധികള്‍, വിവിധ ക്ലബുകളുടെയും, റസിഡന്‍സ് അസോസിയേഷന്റെയും പ്രതിനിധികള്‍, സാമൂഹിക സാംസ്‌കാരിക രംഗത്തെ പ്രവര്‍ത്തകര്‍ എന്നിവര്‍ പങ്കെടുത്ത യോഗത്തില്‍ തീരുമാനിച്ചു.
യോഗം വടകര മുനിസിപ്പല്‍ ചെയര്‍മാന്‍ കെ. ശ്രീധരന്‍ ഉദ്ഘാടനം ചെയ്തു.
വിവിധ രാഷ്ട്രീയ പാര്‍ട്ടികളെ പ്രതിനിധീകരിച്ച് ദിവാകരന്‍, ടി.കേളു, സോമന്‍ മുതുവന, അടിയേരി രവി, എം.പി അഹമ്മദ്, കെ. സോമന്‍, മുക്കോലക്കല്‍ ഹംസ, നിസാം, ടി.ഐ നാസര്‍, രജീഷ് അക്കറോല്‍ സംസാരിച്ചു.