ബംഗളൂരു: ഐ.പി.എല്‍ 2018ലെ താര ലേലം ഈ മാസം 27, 28 തിയതികളില്‍ നടക്കാനിരിക്കെ അന്തിമ പട്ടികയില്‍ 578 താരങ്ങള്‍ മാത്രം. അപേക്ഷ ലഭിച്ച 1122 താരങ്ങളുടെ പട്ടിക നിജപ്പെടുത്തി ഐ.പി.എല്‍ ഗവേണിങ് ബോഡിയാണ് 578 താരങ്ങളായി പട്ടിക നിജപ്പെടുത്തിയത്. ഒരു ടീമിന് പരമാവധി 25 താരങ്ങളെയാണ് ഉള്‍ക്കൊള്ളിക്കാന്‍ അവസരമുള്ളത്. മൊത്തം 182 താരങ്ങള്‍ക്കാണ് ടീമുകളിലേക്ക് അവസരം ലഭിക്കുന്നത്. നിലവില്‍ 18 താരങ്ങള്‍ ടീമിലെ സ്ഥാനം നിലനിര്‍ത്തിയിട്ടുണ്ട്. 360 ഇന്ത്യന്‍ താരങ്ങളും 216 വിദേശ താരങ്ങളും അസോസിയേറ്റ് രാജ്യങ്ങളില്‍ നിന്ന് രണ്ട് താരങ്ങളുമാണ് അന്തിമ പട്ടികയിലുള്ളത്.
രണ്ട് കോടി അടിസ്ഥാന വിലയുള്ള 36 താരങ്ങളാണ് ലേലത്തിലുള്ളത്. ഇതില്‍ 13 പേര്‍ ഇന്ത്യന്‍ താരങ്ങളാണ്. ആര്‍ അശ്വിന്‍, ഗൗതം ഗംഭീര്‍, ശിഖര്‍ ധവാന്‍, അജിന്‍ക്യ രഹാനെ, ഹര്‍ഭജന്‍ സിങ്, യുവരാജ് സിങ്, ക്രിസ് ഗെയ്ല്‍, ബെന്‍ സ്റ്റോക്‌സ്, കെയ്ന്‍ വില്ല്യംസന്‍, ഗ്ലെന്‍ മാക്‌സ്‌വെല്‍, ജോ റൂട്ട്, മിച്ചല്‍ സ്റ്റാര്‍ക്ക്, ഫാഫ് ഡുപ്ലെസിസ്, ഡ്വെയ്ന്‍ ബ്രാവോ, കെയ്‌റോണ്‍ പൊള്ളാര്‍ഡ്, ഷാകിബ് അല്‍ ഹസന്‍ എന്നിവര്‍ രണ്ട് കോടി വിലയുള്ള മാര്‍ക്വീ താരങ്ങളാണ്.