കൊച്ചി: പീസ് ഫൗണ്ടേഷനു കീഴില്‍ കൊടുങ്ങല്ലൂര്‍ മതിലകത്ത് പ്രവര്‍ത്തിക്കുന്ന സ്‌കൂള്‍ അടച്ചു പൂട്ടാനുള്ള സര്‍ക്കാരിന്റെ ഉത്തരവ് ഹൈക്കോടതി സ്റ്റേ ചെയ്തു. സ്‌കൂളിന്റെ പ്രവര്‍ത്തനം കേരള വിദ്യാഭ്യാസ ചട്ടങ്ങള്‍ പാലിച്ചില്ലെന്ന് ചൂണ്ടിക്കാട്ടി അടച്ചുപൂട്ടാന്‍ സര്‍ക്കാര്‍ നോട്ടിസ് നല്‍കിയിരുന്നു. ഇതിനെതിരേ സ്‌കൂള്‍ മാനേജ്‌മെന്റ് നല്‍കിയ ഹരജിയിലാണ് ഹൈക്കോടതി സ്റ്റേ അനുവദിച്ചത്.
ഹര്‍ജി പരിഗണിക്കവെ മതസ്പര്‍ധ വളര്‍ത്തുന്ന പാഠഭാഗങ്ങള്‍ സിലബസിലുണ്ടെന്ന പേരില്‍ സ്‌കൂളിനെതിരേ ക്രിമിനല്‍ കേസ് നിലവിലുണ്ടെന്നും സ്‌കൂള്‍ പ്രവര്‍ത്തിക്കാന്‍ അനുവദിക്കരുതെന്നും സര്‍ക്കാര്‍ അഭിഭാഷകന്‍ ബോധിപ്പിച്ചു. എന്നാല്‍ കേരള വിദ്യാഭ്യാസ ചട്ട പ്രകാരമുള്ള നോട്ടിസിനെ ചോദ്യം ചെയ്യുന്ന ഹരജിയില്‍ ഇക്കാര്യം പരിഗണിക്കാനാവില്ലെന്നായിരുന്നു ഹരജിക്കാരുടെ വാദം. തുടര്‍ന്നാണ് സ്റ്റേ അനുവദിച്ചത്.കേരള വിദ്യാഭ്യാസ ചട്ടം ലംഘിച്ചെന്ന കാരണത്താല്‍ സംസ്ഥാനത്തെ 24 സ്‌കൂളുകള്‍ക്കാണ് സര്‍ക്കാര്‍ നോട്ടിസ് നല്‍കിയിരുന്നത്. ഇതില്‍ 23 സ്‌കൂളുകള്‍ നല്‍കിയ ഹരജികളില്‍ നേരത്തെ ഹൈക്കോടതി സ്റ്റേ അനുവദിച്ചിരുന്നു.