കൊച്ചി: സ്വത്ത് തര്‍ക്കം കുടുംബ ബന്ധങ്ങള്‍ ശിഥിലമാക്കുന്നതിനെതിരേ സാമൂഹിക ഇടപെടല്‍ ഉണ്ടാകണമെന്ന് വനിതാകമ്മിഷന്‍ അധ്യക്ഷ എം.സി ജോസഫൈന്‍.
പലപ്പോഴും ഇവ കൊലപാതകത്തിലേക്ക് വരെ നയിക്കുന്നുണ്ട്. ഇത്തരം തര്‍ക്കങ്ങള്‍ രമ്യമായി പരിഹരിക്കാന്‍ സാമൂഹിക ഇടപെടല്‍ ഉണ്ടാകണമെന്നും വനിതാകമ്മിഷന്‍ അധ്യക്ഷ പറഞ്ഞു.
എറണാകുളം വൈ.എം.സി.എ ഹാളില്‍ നടന്ന മെഗാ അദാലത്തിന് ശേഷം മാധ്യമ പ്രവര്‍ത്തകരോട് സംസാരിക്കുകയായിരുന്നു അവര്‍. പരാതികള്‍ ദിനംപ്രതി വര്‍ധിച്ചുവരികയാണ്. ആരും വിട്ടുവീഴ്ചയ്ക്ക് തയാറാകാത്തതാണ് പ്രശ്‌നങ്ങള്‍ വഷളാകാന്‍ കാരണം. ഗാര്‍ഹിക പീഡനങ്ങള്‍ സംബന്ധിച്ചുള്ള പരാതിയും കൂടിവരുന്നുണ്ട്. ഭര്‍തൃഗൃഹത്തില്‍വച്ച് മാനസികമായോ ശാരീരികമായോ പീഡനത്തിന് ഇരയായാല്‍ കുറഞ്ഞസമയത്തിനുള്ളില്‍ പ്രതിയെ അറസ്റ്റുചെയ്യാന്‍ ഐ.പി.സി 498 എ വകുപ്പ് പ്രകാരം സാധിച്ചിരുന്നു. എന്നാല്‍ ഇക്കഴിഞ്ഞ ജൂലായ് 27ന് ഈ വകുപ്പ് സുപ്രിംകോടതി റദ്ദ് ചെയ്തതിനെ തുടര്‍ന്ന് ഗാര്‍ഹിക പീഡന പരാതിയുമായി എത്തുന്ന സ്ത്രീകള്‍ക്ക് വേഗത്തില്‍ നിയമപരിരക്ഷ ലഭിക്കുന്നില്ലെന്നും ജോസഫൈന്‍ പറഞ്ഞു. ഗാര്‍ഹിക പീഡനം സംബന്ധിച്ച് സ്ത്രീകള്‍ വ്യാജ പരാതി നല്‍കിയേക്കാം എന്നതിനാലാണ് വകുപ്പ് റദ്ദ് ചെയ്തിരിക്കുന്നത്.
സോഷ്യല്‍ മീഡിയകളില്‍ സ്ത്രീകള്‍ക്കെതിരേ നടക്കുന്ന ആക്രമണങ്ങളില്‍ സ്വമേധയാ കമ്മിഷന്‍ കേസ് എടുത്തിട്ടുണ്ട്. ആര്‍.എം.പി നേതാവ് കെ.കെ രമയ്‌ക്കെതിരേ നടന്ന സൈബര്‍ ആക്രമണത്തില്‍ സ്വമേധയാ കേസ് എടുത്തിട്ടുണ്ടോ എന്ന ചോദ്യത്തിന് കേസ് എടുക്കാന്‍ ഓഫിസില്‍ ആവശ്യപ്പെട്ടിരുന്നെന്നും അവധിയിലായതിനാല്‍ കൂടുതല്‍ വിശദാംശങ്ങള്‍ അറിയില്ലെന്നും കമ്മിഷന്‍ പറഞ്ഞു.