വാഷിങ്ടണ്‍: യു.എസ് പ്രസിഡന്റിന്റെ ഔദ്യോഗിക വസതിയായ വൈറ്റ്ഹൗസിനു മുന്നില്‍ അജ്ഞാതന്‍ സ്വയം വെടിവച്ചു മരിച്ചു. വൈറ്റ്ഹൗസിനു മുന്നിലൂടെയുള്ള തിരക്കേറിയ നടപ്പാതയിലായിരുന്നു സംഭവം.
പ്രാദേശിക സമയം ശനിയാഴ്ച രാവിലെ 11.45ന് ഇതുവഴി വന്ന ഒരാള്‍ കൈയില്‍ കരുതിയിരുന്ന തോക്ക് കൊണ്ട് സ്വയം വെടിവയ്ക്കുകയായിരുന്നുവെന്ന് പരിസരത്തുണ്ടായിരുന്ന സുരക്ഷാ ജീവനക്കാര്‍ അറിയിച്ചു. നിരവധി തവണ ഇയാള്‍ സ്വയം വെടിയുതിര്‍ക്കുകയായിരുന്നു. വൈറ്റ്ഹൗസിന്റെ വടക്കുഭാഗത്തെ മതിലിനടുത്തായിരുന്നു സംഭവം. ഉടന്‍ മെഡിക്കല്‍ സംഘം സ്ഥലത്തെത്തി ഇയാളെ ആശുപത്രിയിലെത്തിച്ചെങ്കിലും രക്ഷിക്കാനായില്ല.
ഇയാളെ കുറിച്ചുള്ള വിവരങ്ങള്‍ അധികൃതര്‍ പുറത്തുവിട്ടിട്ടില്ല. സംഭവസമയത്ത് ടൂറിസ്റ്റുകള്‍ അടക്കം നൂറുകണക്കിനു പേര്‍ സമീപത്തുണ്ടായിരുന്നു. ആര്‍ക്കും പരുക്കേറ്റിട്ടില്ലെന്ന് പൊലിസ് അറിയിച്ചു.