കാബൂള്‍: ഫറഹ് പ്രവിശ്യയില്‍ താലിബാനെതിരേ തിരിച്ചടിച്ച് അഫ്ഗാനിസ്താന്‍ സൈന്യം. അനാര്‍ ദാറ ജില്ലയിലെ പൊലിസ്-ഭരകൂട കാര്യാലയങ്ങള്‍ തിരിച്ചുപിടിച്ചെന്ന് അഫ്ഗാന്‍ സൈന്യം അവകാശപ്പെട്ടു. മണിക്കൂറുകള്‍ നീണ്ട കര-വ്യോമ സൈനിക നടപടികള്‍ക്കൊടുവിലാണ് ഇവിടെനിന്ന് താലിബാന്‍ പോരാളികളെ തുരത്തിയത്. സൈനിക നടപടിയില്‍ ജില്ലാ പൊലിസ് മേധാവിയടക്കം എട്ട് അഫ്ഗാന്‍ സുരക്ഷാ ഉദ്യോഗസ്ഥര്‍ കൊല്ലപ്പെട്ടു.
തിങ്കളാഴ്ച 300ഓളം താലിബാന്‍ പോരാളികള്‍ ചേര്‍ന്ന് അനാര്‍ ദാറ ജില്ലയിലെ പൊലിസ് ആസ്ഥാനം ആക്രമിച്ചിരുന്നു. തൊട്ടടുത്തുള്ള ബാലാ ബുലൂക് ജില്ലയില്‍ ഏഴ് സൈനികരെയും എട്ട് പൊലിസ് ഉദ്യോഗസ്ഥരെയും താലിബാന്‍ വധിച്ചിരുന്നു.