കോട്ടയം: സംസ്ഥാനത്ത് കഴിഞ്ഞദിവസം പ്രഖ്യാപിച്ച ഹര്‍ത്താല്‍ മുന്‍കൂട്ടി കാണുന്നതില്‍ സംസ്ഥാന ഇന്റലിജന്‍സ് സംവിധാനം പരാജയപ്പെട്ടെന്ന് ഇടത് അനുകൂല സംഘടനയായ നാഷനല്‍ സെക്യുലര്‍ കോണ്‍ഫറന്‍സ് (എന്‍എസ്‌സി). സോഷ്യല്‍ മീഡിയകള്‍വഴി വ്യാപകമായി ഹര്‍ത്താല്‍ നടത്തുമെന്ന് പ്രഖ്യാപിച്ചതാണ്.
എന്നിട്ടും മുന്‍കരുതല്‍ നടപടികള്‍ സ്വീകരിക്കുന്നതില്‍ പോലിസ് പരാജയപ്പെട്ടു. ഹര്‍ത്താലിന് പിന്നിലുള്ള അജണ്ടയെന്താണെന്നും ഇന്റലിജന്‍സിന് കണ്ടെത്താനായില്ലെന്നും സംസ്ഥാന ജനറല്‍ സെക്രട്ടറി എം എ ജലീല്‍ പുനലൂര്‍ വാര്‍ത്താസമ്മേളനത്തില്‍ കുറ്റപ്പെടുത്തി. വാരാപ്പുഴ കസ്റ്റഡി മരണത്തോട് ഒരുതരത്തിലും യോജിക്കാനാവില്ല.
ലോക്കപ്പ് മരണങ്ങള്‍ ആദ്യസംഭവമല്ല. എല്‍ഡിഎഫ് സര്‍ക്കാരിനെ അപകീര്‍ത്തിപ്പെടുത്താന്‍ പോലിസിലെ ഒരുവിഭാഗം ശ്രമിക്കുന്നുണ്ട്. പോലിസില്‍ 1,200 ക്രിമിനലുകളാണുള്ളത്. ഇവരെ ഒഴിവാക്കി പോലിസ് സേനയെ സംശുദ്ധമാക്കണം. കശ്മീരില്‍ എട്ടുവയസുകാരി ബലാല്‍സംഗത്തിനിരയായി കൊല്ലപ്പെട്ട വിഷയത്തില്‍ നാലുമാസങ്ങള്‍ക്കുശേഷമുള്ള ഇ ടി മുഹമ്മദ് ബഷീറിന്റെ കശ്മീര്‍ സന്ദര്‍ശനവും ലീഗിന്റെ ഇടപെടലും ശുദ്ധ ഇരട്ടത്താപ്പാണ്. നയത്തിന്റെ അടിസ്ഥാനത്തിലാണ് ഇടതുപക്ഷവുമായി സഹകരിക്കുന്നത്. അല്ലാതെ മുന്നണി ബന്ധമല്ല അവസാനവാക്ക്. രാജ്യത്തെ മതനിരപേക്ഷതയ്ക്കും ന്യൂനപക്ഷ സംരക്ഷണത്തിനും പോരാട്ടം നടത്തുന്നത് ഇടതുപക്ഷം മാത്രമാണെന്നും അദ്ദേഹം കൂട്ടിച്ചേര്‍ത്തു. എന്‍എസ്‌സി കോട്ടയം ജില്ലാ പ്രസിഡന്റ് റസ്സാഖ് താഴത്തങ്ങാടി, ജനറല്‍ സെക്രട്ടറി കെ എച്ച് സിദ്ദീഖ് എന്നിവരും വാര്‍ത്താസമ്മേളനത്തില്‍ പങ്കെടുത്തു.