മനാമ: ബഹ്‌റൈനിലെ ഇന്ത്യന്‍ സ്‌കൂളില്‍ തീപിടിച്ച ബസ് പൂര്‍ണമായും കത്തി നശിച്ചു. ചൊവ്വാഴ്ച രാവിലെയാണ് സംഭവം. സ്‌കൂളിന്റെ സമീപത്ത് വച്ചാണ് ബസിന് തീപിടിച്ചത്. സേക്രട്ട് ഹാര്‍ട്ട് സ്‌കൂളിന് എതിര്‍ വശത്തുള്ള സ്‌കൂള്‍ ഗെയ്റ്റിന് സമീപം ബസ് നിര്‍ത്തിയിടുകയും മുഴുവന്‍ കുട്ടികളെയും ബസില്‍ നിന്ന് ജീവനക്കാര്‍ പുറത്തിറക്കുകയുമായിരുന്നു.
കുട്ടികളെ ഇറക്കിയ ശേഷം ബസ് കത്തിനശിച്ചു. സിവില്‍ ഡിഫന്‍സും പൊലിസും സ്ഥലത്തെത്തിയിരുന്നു. അതേസമയം, ഇന്ത്യന്‍ സ്‌കൂളിന് തീപിടിച്ചെന്ന വാര്‍ത്ത സോഷ്യല്‍ മീഡിയ വഴി പ്രചരിച്ചത് പ്രവാസി രക്ഷിതാക്കള്‍ക്കിടയില്‍ ആശങ്ക പരത്തി. പലരും സ്‌കൂള്‍ മേധവികളുമായും മറ്റും ബന്ധപ്പെട്ടാണ് കുട്ടികള്‍ സുരക്ഷിതരാണെന്ന്  ഉറപ്പുവരുത്തിയത്. വൈകാതെ തീപിടിക്കുന്ന ബസിന്റെ ഫോട്ടോകളും വിഡിയോകളും സോഷ്യല്‍ മീഡിയകളിലൂടെ പ്രചരിക്കുകയും ചെയ്തിരുന്നു.