കരുനാഗപ്പള്ളി: എക്‌സൈസ് സര്‍ക്കിള്‍ ഇന്‍സ്‌പെക്ടര്‍ മധുസൂദനന്‍ പിള്ളയുടെ നേതൃത്വത്തിലുള്ള അന്വേഷണ സംഘം ആറുലിറ്റര്‍ ചാരായവുമായി ഒരാളെ പിടികൂടി. പാവുമ്പ വില്ലേജില്‍ പുത്തന്‍വിളതെക്കതില്‍ ദാമോദരന്‍ മകന്‍ സത്യപാലനെയാ(47)ണ് പിടികൂടിയത്. രഹസ്യവിവരത്തിന്റെ അടിസ്ഥാനത്തിലായിരുന്നു അറസ്റ്റ്.
മുന്‍പ് നിരവധി തവണ ചാരായ വില്‍പന നടത്തിയതിന് ഇയാള്‍ അറസ്റ്റിലായിട്ടുണ്ട്. പാവുമ്പയില്‍ ഉത്സവത്തോടനുബന്ധിച്ച് വന്‍തോതില്‍ ചാരായം നിര്‍മിച്ച് വില്‍പന നടത്താന്‍ തുടങ്ങുന്നതിനിടെ ആയിരുന്നു അറസ്റ്റ്. അവശ്യക്കാരനെന്ന രീതിയില്‍ ചാരായത്തിന് ഓര്‍ഡര്‍ കൊടുത്ത് വിളിച്ചു വരുത്തി അറസ്റ്റ് ചെയ്യുകയായിരുന്നു. ഇയാള്‍ ചാരായം കൊണ്ടുവന്ന ബൈക്കും കസ്റ്റഡിയിലെടുത്തിട്ടുണ്ട്.
ഇയാളുടെ കൂട്ടാളിയെയും നിര്‍മാണ കേന്ദ്രത്തെയും കുറിച്ച് എക്‌സൈസ് അന്വേഷണമാരംഭിച്ചു. സര്‍ക്കിളിലെ ഉത്സവങ്ങളോടനുബന്ധിച്ച് വ്യാജമദ്യ നിര്‍മാണം ഉണ്ടാകാതിരിക്കാന്‍ ശക്തമായ റെയ്ഡുകള്‍ വരും ദിവങ്ങളില്‍ ഉണ്ടാവുമെന്ന് സര്‍ക്കിള്‍ ഇന്‍സ്‌പെക്ടര്‍ അറിയിച്ചു. റെയ്ഡില്‍ അസി. എക്‌സൈസ് ഇന്‍സ്‌പെക്ടര്‍ എന്‍.സനില്‍കുമാര്‍, സി.ഇ.ഒമാരായ സന്തോഷ്, അനില്‍കുമാര്‍, സുധീര്‍ബാബു എന്നിവരും പങ്കെടുത്തു.