കോഡൂര്‍: വലിയാട് യു.എ.എച്ച്.എം.എല്‍.പി സ്‌കൂളില്‍ പച്ചക്കറി കൃഷിയുടെ വിളവെടുപ്പുത്സവം നടന്നു. വിദ്യാര്‍ഥികളുടെ നേതൃത്വത്തിലുള്ള ഹരിതം കാര്‍ഷിക ക്ലബ് തയാറാക്കിയ കൃഷിത്തോട്ടത്തിലാണ് വിളവെടുത്തത്.
മാതൃകാപരമായ പ്രവര്‍ത്തനങ്ങള്‍ക്കു ജില്ലാതലത്തില്‍ കൃഷി വകുപ്പ് നല്‍കുന്ന അംഗീകാരം മുന്‍വര്‍ഷം വലിയാട് സ്‌കൂളിനു ലഭിച്ചിരുന്നു. വിദ്യാലയ കൃഷിക്കു നേതൃത്വം നല്‍കുന്ന പ്രഥമാധ്യാപകനുള്ള അവാര്‍ഡ് കെ.എം മുസ്തഫയ്ക്കാണ് ലഭിച്ചത്. സ്‌കൂളിനു സമീപം മങ്കരത്തൊടി അബൂബക്കര്‍ ഹാജിയുടെ കുടുംബസ്ഥലത്ത് സൗജന്യമായാണ് കൃഷിത്തോട്ടമൊരുക്കുന്നത്. തക്കാളി, വെണ്ട, ചീര, വഴുതന, പയറ്, കപ്പ, വാഴ തുടങ്ങിയവയാണ് പ്രധാനമായും കൃഷി ചെയ്യുന്നത്.
വിളവെടുപ്പ് ഉത്സവം പഞ്ചായത്ത് കൃഷി ഓഫിസര്‍ പ്രകാശ് പുത്തന്‍മഠത്തില്‍ ഉദ്ഘാടനം ചെയ്തു. സ്‌കൂള്‍ പി.ടി.എ പ്രസിഡന്റ് പി.പി അബ്ദുല്‍ നാസര്‍ അധ്യക്ഷനായി. പഞ്ചായത്തംഗം മുഹമ്മദലി കടമ്പോട്ട്, പ്രഥമാധ്യാപകന്‍ കെ.എം മുസ്തഫ, ഹരിതം കാര്‍ഷിക ക്ലബ് കോഡിനേറ്റര്‍മാരായ എന്‍.വി ഫായിസ, കെ. ഷഹീദ അധ്യാപകരായ കെ.ആര്‍ നാന്‍സി, സുബോദ് പി. ജോസഫ്, ഹണി ജോര്‍ജ്, കെ.പി ഷൈനി, ജൗഹറത്തുല്‍ കല്‍ഖ്, ഡെസിന്‍ മാത്യു, കെ. നസീമ യാസ്മിന്‍, പി.പി അബ്ദുല്‍ ഹക്കീം, എം. റിയാസ്, എം.ടി രഹ്ന, എം.ടി സല്‍വ സംബന്ധിച്ചു.