മഞ്ചേരി: മലപ്പുറം ജില്ലയില്‍ കൊവിഡ് - 19 സ്ഥിരീകരിച്ച സ്ത്രീയുടെ കൂടെ യാത്ര ചെയ്തത് നൂറോളം പേരെന്ന് വിവരം. 55 കാരി ഈ മാസം 12ന് രാവിലെ ഏഴിനാണ് ഉംറ കഴിഞ്ഞ് നെടുമ്പാശേരിയില്‍ വിമാനമിറങ്ങിയത്. 78 പേര്‍ ഒരുമിച്ചാണ് വിമാനത്താവളത്തില്‍ എത്തിയത്. 

ഇവിടെ നിന്ന് 43 പേര്‍ ട്രാവല്‍സ് ഗ്രൂപ്പിന്റെ ബസ് മാര്‍ഗം കൊണ്ടോട്ടി ഹജ്ജ് ഹൗസിലെത്തി. രോഗം സ്ഥിരീകരിക്കപ്പെട്ട സ്ത്രീയും മറ്റു നാലു പേരും വൈകിട്ട് മൂന്നോടെ കൊളത്തൂര്‍ ജംങ്ഷനില്‍ ബസ് ഇറങ്ങി. അരീക്കോട്, കാവനൂര്‍, ഊര്‍ങ്ങാട്ടിരി, കീഴുപറമ്പ് പഞ്ചായത്തുകളില്‍ നിന്നുള്ള ആളുകള്‍ ഉള്‍പ്പടെയുള്ള 43 പേരാണ് നെടുമ്പാശ്ശേരി മുതല്‍ ഹജ്ജ് ഹൗസ് വരെ ബസില്‍ ഉണ്ടായിരുന്നതെന്നാണ് വിവരം. രോഗം സ്ഥിരികരിക്കപ്പെട്ട സ്ത്രീയും ഭര്‍ത്താവും മരുമകളും ഒരു വാഹനത്തിലാണ് വീട്ടിലേക്ക് മടങ്ങിയത്. ഇവരെ വീട്ടിലേക്ക് കൊണ്ടുപോവാന്‍ എത്തിയ മക്കള്‍ ഉള്‍പ്പടെ മൂന്ന് പേരും ഈ സമയം രണ്ട് വാഹനങ്ങളിലായി ഉണ്ടായിരുന്നു. 

12ന് വൈകിട്ട് നാലിനാണ് ഇവര്‍ വീട്ടിലെത്തിയത്. ഈ സമയം പരിസര വീടുകളിലെ സ്ത്രീകള്‍ ഉള്‍പ്പടെയുള്ളവര്‍ ഇവരെ കാണാനായി വീട്ടില്‍ എത്തിയിരുന്നു. വീട്ടിലെത്തിയപ്പോഴും രാത്രിയും പനിയും ചുമയും അനുഭവപ്പെട്ടു. 13ന് രാവിലെ ഒന്‍പതിന് അരീക്കോട് താലൂക്ക് ആശുപത്രിയില്‍ ചികിത്സതേടി. എന്നാല്‍ വിദേശയാത്ര കഴിഞ്ഞ് എത്തിയ വിവരം ഇവര്‍ ഡോക്ടറില്‍നിന്നു മറച്ചുവച്ചു. ഇതോടെ പനിക്കും ചുമക്കും മരുന്ന് നല്‍കി ഡോക്ടര്‍ രോഗിയെ വീട്ടിലേക്ക് അയച്ചു. ചികില്‍സ തേടി വീട്ടില്‍ തിരിച്ചെത്തിയ ഉടനെ ആരോഗ്യ പ്രവര്‍ത്തകര്‍ ഇവരോട് വീണ്ടും ആശുപത്രിയില്‍ എത്താന്‍ ആവശ്യപ്പെട്ടു. ഡോക്ടറെ കാണിച്ച് മരുന്ന് വാങ്ങിയ വിവരം അറിയിച്ചെച്ചെങ്കിലും വിദേശയാത്ര നടത്തിയതിനാല്‍ ആശുപത്രിയില്‍ തിരികെയെത്തണമെന്ന് ആരോഗ്യ പ്രവര്‍ത്തകര്‍ പറഞ്ഞതോടെ വീണ്ടും അരീക്കോട് താലൂക്ക് ആശുപത്രിയില്‍ തന്നെ ചികിത്സ തേടുകയായിരുന്നു. 

ഇവിടെ നിന്നാണ് 13ന് ഉച്ചയോടെ മഞ്ചേരി മെഡിക്കല്‍ കോളജ് ആശുപത്രിയിലെ ഐസോലേഷന്‍ വാര്‍ഡിലേക്ക് മാറ്റിയത്. മെഡിക്കല്‍ കോളജ് ആശുപത്രി ഐസുലേഷന്‍ വാഡില്‍ നിരീക്ഷണത്തിലുള്ള രണ്ടു പേര്‍ക്കാണ് ജില്ലയില്‍ കോവിഡ്-19 സ്ഥിരീകരിച്ചത്. കൊളത്തൂര്‍ ജംങ്ഷനില്‍നിന്ന് രോഗം സ്ഥിരീകരിച്ച സ്ത്രീ ഉള്‍പ്പടെയുള്ളവരെ വീട്ടിലേക്ക് കൊണ്ടുപോയവരും വീടുകളില്‍ നിരീക്ഷണത്തിലാണ്.