കുറ്റിപ്പുറം: തവനൂരിലെ വെള്ളാഞ്ചേരി കടവില്‍ കുറ്റിപ്പുറം എസ്.ഐ നിപുന്‍ ശങ്കറിന്റെ നേതൃത്വത്തില്‍ ശനിയാഴ്ച രാവിലെ പൊലിസ് സംഘം നടത്തിയ മിന്നല്‍ പരിശോധനയില്‍ അനധികൃതമായി കടത്താന്‍ ശ്രമിച്ച നൂറോളം മണല്‍ ചാക്കുകള്‍ പിടികൂടി.
പിടിച്ചെടുത്ത മിനി ഗുഡ്‌സ് വണ്ടിയില്‍ നിന്നും ഒരു പാസ്‌പോര്‍ട്ടും പൊലിസ് കണ്ടെടുത്തു. റാഷിദ് എന്ന യുവാവിന്റെ പേരിലുള്ള പാസ്‌പോര്‍ട്ടാണ് വണ്ടിയില്‍ നിന്ന് പൊലിസിന് ലഭിച്ചത്. ആദ്യമായാണ് മണല്‍ കടത്തിന് ഉപയോഗിക്കുന്ന വണ്ടിയില്‍ നിന്ന് പാസ്‌പോര്‍ട്ട് കിട്ടുന്നത്. പൊലിസിനെ കണ്ട പാടെ മണല്‍ ചാക്കുകള്‍ വണ്ടിയില്‍ കയറ്റി കൊണ്ടിരുന്ന യുവാവ് ഓടി രക്ഷപ്പെട്ടു. പിടികൂടി മണല്‍ പുഴയിലേക്ക് തിരിച്ചു തള്ളി. പിടിച്ചെടുത്ത വാഹനവും പാസ്‌പോര്‍ട്ടും ഇന്ന് കോടതിയില്‍ ഹാജറാക്കുമെന്ന് എസ്.ഐ നിപുന്‍ ശങ്കര്‍ പറഞ്ഞു. സി.പി.ഒമാരായ ജനീഷ്, ഹരികുമാര്‍, ഹരി നാരായണന്‍ എന്നിവരും സംഘത്തിലുണ്ടായിരുന്നു.