നീലേശ്വരം: കെ.എസ്.ആര്‍.ടി.സി ബസ് തടഞ്ഞ് ഡ്രൈവറെ കൈയേറ്റം ചെയ്യാന്‍ ശ്രമിച്ചതായി പരാതി. പയ്യന്നൂര്‍ ഡിപ്പോയിലെ ഡ്രൈവര്‍ മുഹമ്മദ് ജലീലിനു നേരെയാണു കൈയേറ്റശ്രമം നടന്നത്.
പയ്യന്നൂര്‍-കൊന്നക്കാട്-കോട്ടയം റൂട്ടിലോടുന്ന ബസാണ് ഇന്നലെ ഉച്ചയ്ക്കു രണ്ടിനു തടഞ്ഞത്. നീലേശ്വരം പാലാത്തടം കാംപസിനു മുന്നിലായിരുന്നു സംഭവം. ബൈക്കിലെത്തിയ മൂന്നംഗ സംഘമാണ് ബസ് തടഞ്ഞത്. ബൈക്കിന് സൈഡ് കൊടുത്തില്ലെന്ന കാരണം പറഞ്ഞായിരുന്നു അക്രമം.
ഒടുവില്‍ യാത്രക്കാരും മറ്റും ഇടപെട്ടാണ് ഡ്രൈവറെ രക്ഷിച്ചത്. അതോടെ ബസിന്റെ ട്രിപ്പും മുടങ്ങി. സംഭവം സംബന്ധിച്ച് നീലേശ്വരം പൊലിസില്‍ പരാതി നല്‍കി.