ജിദ്ദ: അല്‍ജൗഫ് സക്കാക്കയിലുണ്ടായ വാഹനാപകടത്തില്‍ മലയാളി കുടുംബത്തിന് ഗുരുതര പരുക്ക്. തബൂക്ക് - സകാക്ക റോഡില്‍ കഴിഞ്ഞ ദിവസം പുലര്‍ച്ചെ 4.30ഓടെ രണ്ട് കാറുകളും മിനി ട്രക്കും കൂട്ടിയിടിച്ചുണ്ടായ അപകടത്തില്‍ മലപ്പുറം സ്വദേശി യാസിറിനും ഭാര്യ റഫക്കും ആറുമാസം മാത്രം പ്രായമുള്ള മകള്‍ ഫാസക്കുമാണ് പരുക്കേറ്റത്.

ഇവരെ ആദ്യം മൈഖോവ ആശുപത്രിയിലും തുടര്‍ന്ന് ദൗമ ആശുപത്രിയിലും പ്രാഥമിക ശുശ്രൂഷ നല്‍കിയ ശേഷം സകാക്ക സെന്‍ട്രല്‍ ആശുപത്രിയിലെ തീവ്രപരിചരണ വിഭാഗത്തില്‍ പ്രവേശിപ്പിച്ചിരിക്കുകയാണ്. സാന്‍ഫോര്‍ഡ് ഇലക്‌ട്രോണിക്‌സ് കമ്പനിയില്‍ സെയില്‍സ്മാനായ യാസിര്‍ ഓടിച്ച കാര്‍ നിയന്ത്രണം വിട്ട് തൃശൂര്‍ സ്വദേശിയും ജാദ്‌കോ കമ്പനി ജീവനക്കാരനുമായ തോമസ് ഓടിച്ച മിനിട്രക്കിലും പിന്നാലെ വന്ന സ്വദേശി പൗരന്റെ കാറിലും ഇടിക്കുകയായിരുന്നു. ഇടിയുടെ ആഘാതത്തില്‍ വാഹനങ്ങള്‍ പൂര്‍ണമായി തകര്‍ന്നു.