ബെയ്ജിങ്: ദക്ഷിണ ചൈനാ കടലിലൂടെ രണ്ട് യു.എസ് യുദ്ധക്കപ്പലുകള്‍ സഞ്ചരിച്ചതായി ചൈന. ഉ.കൊറിയന്‍ വിഷയത്തില്‍ ട്രംപ് നിരന്തരം ചൈനയുടെ സഹകരണം ആവശ്യപ്പെടുന്നതിനിടെയാണ് അമേരിക്കയുടെ പ്രകോപനപരമായ നടപടി.
തര്‍ക്കം നിലനില്‍ക്കുന്ന കടലിലെ പരാസെല്‍ ഉപദ്വീപുകളില്‍നിന്ന് 12 നോട്ടിക്കല്‍ മൈല്‍ ദൂരത്തിലാണ് അമേരിക്കന്‍ കപ്പലുകള്‍ സഞ്ചരിച്ചതെന്ന് യു.എസ് വൃത്തങ്ങള്‍ അറിയിച്ചു. മിസൈല്‍വേധ സംവിധാനം വഹിക്കുന്ന കപ്പലും മിസൈല്‍ ക്രൂയ്‌സര്‍ അടങ്ങിയ ആന്റീറ്റാം കപ്പലുമാണ് ഇവിടെയെത്തിയത്. മേഖലയുടെ നിയന്ത്രണം സ്വന്തമാക്കാനുള്ള ചൈനയുടെ ശ്രമത്തിനു തിരിച്ചടിയായാണ് അമേരിക്കന്‍ കപ്പലുകള്‍ ഇതുവഴി സഞ്ചരിച്ചതെന്നാണു വിലയിരുത്തപ്പെടുന്നത്. ഇവിടെ ചൈനയുടെ അവകാശവാദത്തെ ചോദ്യംചെയ്ത് ഇടക്കിടെ യു.എസ് കപ്പലുകള്‍ പ്രത്യക്ഷപ്പെടാറുണ്ട്.