കുന്നംകുളം: കളഞ്ഞുകിട്ടിയ രണ്ടുപവന്റെ കൈച്ചെയ്ന്‍ ഉടമസ്ഥന് തിരിച്ചുനല്‍കി യുവാവ് മാതൃകയായി. കുന്നംകുളം ചെമ്മണ്ണൂര്‍ സ്വദേശിയായ മാമ്പുള്ളി വീട്ടില്‍ ഷൈജിത്താണ്  (33) തനിക്കു കളഞ്ഞുകിട്ടിയ രണ്ടു പവന്‍ വരുന്ന കൈച്ചെയിന്‍ ഉടമസ്ഥന് തിരികെ നല്‍കിയത്. വരവൂര്‍ സ്വദേശിയായ ആവശ്ശേരി വീട്ടില്‍  നിഖിലിന്റേതായിരുന്നു കൈച്ചെയിന്‍. ഞായറാഴ്ച കുന്നംകുളം ആനായ്ക്കലില്‍ ശ്രീനാരായണഹാളില്‍ വെച്ചാണ് കൈചെയിന്‍ നഷ്ടപ്പെട്ടത്. നിഖിലിന്റെ ഭാര്യയുടെ സുഹൃത്തിന്റെ വിവാഹനിശ്ചയത്തില്‍ പങ്കെടുക്കാനെത്തിയതായിരുന്നു ഇവര്‍. ചടങ്ങില്‍ പങ്കെടുത്തു വീട്ടിലെത്തിയപ്പോഴാണ് കൈചെയിന്‍ നഷ്ട്ടപ്പെട്ട വിവരം അറിയുന്നത്. തുടര്‍ന്ന്  തിങ്കളാഴ്ച രാവിലെ ആനായ്ക്കലിലെത്തി കൈചെയിന്‍ തിരയുന്നതിനിടയിലാണ്, കൈചെയിന്‍ പൊലിസ് സ്റ്റേഷനില്‍ ഉണ്ടെന്ന വിവരം അറിയുന്നത്. ചടങ്ങിനെത്തിയ ഷൈജിത്ത് കൈചെയിന്‍ കളഞ്ഞുകിട്ടിയതിനെ തുടര്‍ന്ന് ഉടമസ്ഥനെ കണ്ടെത്തുന്നതിനായി   ഞായറാഴ്ച  തന്നെ കുന്നംകുളം പൊലിസില്‍ ഏല്‍പ്പിച്ചിരുന്നു. തുടര്‍ന്ന് ഷൈജിത്തിനെയും സ്റ്റേഷനിലെത്തിച്ചു പൊലിസുകാരുടെ സാന്നിധ്യത്തില്‍ കൈചെയിന്‍ നിഖിലിന് കൈമാറി.സീനിയര്‍ സി പി ഒ നന്ദന്‍,സിവില്‍ പൊലിസ് ഓഫിസര്‍മാരായ  ശരത്, സജീവ്  റൈറ്റര്‍ ലത്തീഫ്  സംബന്ധിച്ചു.