നിലമ്പൂര്‍: മമ്പാട് ജനകീയ സമിതി സംഘടിപ്പിക്കുന്ന പാലിയേറ്റീവ് അഖിലേന്ത്യാ സെവന്‍സ് ഫുട്‌ബോള്‍ ടൂര്‍ണമെന്റിന് നാളെ തുടക്കമാകുമെന്ന് സംഘാടകര്‍ വാര്‍ത്താ സമ്മേളനത്തില്‍ അറിയിച്ചു. രാത്രി 8.30ന് സിനിമാ താരം മാമുക്കോയ ഉദ്ഘാടനം ചെയ്യും. ഉദ്ഘാടനത്തോടനുബന്ധിച്ച് വൈകിട്ട് നാലിന് മമ്പാട് ടൗണില്‍ ഘോഷയാത്രയും, ടൂര്‍ണമെന്റ് നടക്കുന്ന മൈതാനത്ത് ഗാനമേള, വിവിധ കലാപരിപാടികള്‍ എന്നിവയും സംഘടിപ്പിച്ചിട്ടുണ്ട്. ഒരു മാസം നീണ്ടു നില്‍ക്കുന്ന ടൂര്‍ണമെന്റില്‍ പ്രമുഖരായ 26 ടീമുകള്‍ പങ്കെടുക്കും.
ഉദ്ഘാടന മത്സരത്തില്‍ നാളെ അല്‍ ശബാബ് തൃപ്പനച്ചിയും, കെ.ആര്‍.എസ് കോഴിക്കോടും തമ്മില്‍ മാറ്റുരക്കും. കഴിഞ്ഞ രണ്ടു വര്‍ഷമായി പ്രവര്‍ത്തിച്ചുവരുന്ന മമ്പാട് പാലിയേറ്റീവ് കെയര്‍ യൂനിറ്റിന്റെ പ്രവര്‍ത്തനങ്ങള്‍ക്കായാണ് ടൂര്‍ണമെന്റില്‍ നിന്നും ലഭിക്കുന്ന ലാഭം പൂര്‍ണമായും വിനിയോഗിക്കുന്നത്.
മമ്പാട് ഫ്രന്റ്‌സ് ഫ്‌ളഡ്‌ലിറ്റ് സ്‌റ്റേഡിയത്തില്‍ ദിവസവും രാത്രി 8.30ന് മത്സരം നടക്കും. ടൂര്‍ണമെന്റിന്റെ പ്രചാരണാര്‍ഥം ഇന്ന് വൈകിട്ട് നാലിന് പൊങ്ങല്ലൂരില്‍ നിന്നും 20 ക്ലബുകളില്‍ നിന്നുള്ള അംഗങ്ങള്‍ പങ്കെടുക്കുന്ന ബൈക്ക് റാലി നടക്കും. വാര്‍ത്താസമ്മേളനത്തില്‍ കെ.കെ കുട്ടി, ഡോ.പി.അന്‍വര്‍, കെ.സലാഹുദ്ദീന്‍, ടി.സഫറുള്ള, ടി.ഷമീര്‍ബാബു, കെ.ടി അക്ബര്‍, ടി.എച്ച് ഹിദായത്തുള്ള എന്നിവര്‍ പങ്കെടുത്തു.