ചങ്ങരംകുളം: ബിഹാറി യുവാവ് മോഷ്ടിച്ച മൊബൈല്‍ ഫോണ്‍ പൊലിസിന്റെ തന്ത്രപരമായ ഇടപെടല്‍ മൂലം സുഹൃത്ത് വഴി പൊലിസ് സ്റ്റേഷനില്‍ലെത്തിച്ചു. രണ്ടാഴ്ച മുന്‍പു പാവിട്ടപ്പുറം കിഴിക്കര സ്വദേശിയായ സാബിറിന്റെ മൊബൈല്‍ ഫോണ്‍ ചങ്ങരംകുളത്തെ പലചരക്കു കടയില്‍ മറന്നുവച്ചതിനെ തുടര്‍ന്നു മോഷണം പോയിരുന്നു.
സി.സി.ടി.വി പരിശോധിച്ചപ്പോഴാണ് ബിഹാറി യുവാവ് മൊബൈല്‍ ഫോണ്‍ മോഷ്ടിച്ചു കടന്നുകളയുന്ന ദൃശ്യം ശ്രദ്ധയില്‍പെട്ടത്. പരാതി നല്‍കിയതിനെ തുടര്‍ന്നു സംഭവമറിഞ്ഞ മോഷ്ടാവ് നാട്ടിലേക്കു കടക്കുകയായിരുന്നു. തുടര്‍ന്നു പൊലിസ് ഇയാളുടെ സുഹൃത്തുക്കളെ ബന്ധപ്പെടുകയും മൊബൈല്‍ മോഷ്ടാവിനെ വിളിച്ചുവരുത്താന്‍ ശ്രമിക്കുകയും ചെയ്‌തെങ്കിലും മോഷ്ടാവ് മൊബൈല്‍ ഫോണ്‍ സ്വിച്ച് ഓഫ് ചെയ്തതോടെ പരാജയപ്പെടേടു.
തുടര്‍ന്നു നാട്ടുകാര്‍ മുഖേനെ മോഷ്ടാവിന്റെ വീടുമായി ബന്ധപ്പെട്ടപ്പോള്‍ വീട്ടുകാരും സംഭവം നിഷേധിച്ചു. സംഭവം കേസാണെന്നും അറസ്റ്റ് ചെയ്യുമെന്നും ഭാര്യയെ വിളിച്ച് ഭീഷണിപ്പെടുത്തിയതോടെ കാര്യങ്ങള്‍ എളുപ്പത്തിലായി. ഉടന്‍തന്നെ മൊബൈല്‍ ഫോണ്‍ കേരളത്തില്‍ എത്തിക്കാമെന്നും കേസ് ഒഴിവാക്കിത്തരണമെന്നും അഭ്യര്‍ഥിച്ച് പൊലിസിന് ഭാര്യയുടെ വിളിയെത്തി. മൊബൈലിന്റെ ഉടമയ്ക്കു മൊബൈല്‍ തിരിച്ചുകിട്ടിയാല്‍ മതിയെന്നു പറഞ്ഞതോടെ സുഹൃത്ത് വഴി ചങ്ങരംകുളം പൊലിസ് സ്റ്റേഷനില്‍ കഴിഞ്ഞ ദിവസം മൊബൈല്‍ എത്തി. ഉടമ സ്റ്റേഷനിലെത്തി മൊബൈല്‍ കൈപ്പറ്റി.