ദമ്മാം: ഇന്നലെ ജിദ്ദയിലെ അമേരിക്കന്‍ കോണ്‍സുലേറ്റ് ലക്ഷ്യമാക്കി നടന്ന ചാവേറാക്രമണത്തില്‍ ചാവേറായി പൊട്ടിതെറിച്ചത് പാകിസ്ഥാന്‍ പൗരനാണെണ് സഊദി ആഭ്യന്തര മന്ത്രാലയം സ്ഥിരീകരിച്ചു. കഴിഞ്ഞ 12 വര്‍ഷമായി ജിദ്ദയില്‍ താമസിച്ചു വന്നിരുന്ന അബ്ദുള്ള ഖല്‍സര്‍ ഖാന്‍ എന്നയാളാണ് ചാവേറായത്.

ഇന്നലെ ജിദ്ദയിലെ അമേരിക്കന്‍ കോണ്‍സുലേറ്റ് ലക്ഷ്യമായെത്തിയ ചാവേര്‍ ആക്രമണം സുരക്ഷാ ഉദ്യോഗസ്ഥര്‍ പരാചയപ്പെടുത്തുകയായിരുന്നു. തിങ്കളാഴ്ച പുലര്‍ച്ചെ കോണ്‍സുലേറ്റിനെ ലക്ഷ്യം വെച്ച് നീങ്ങിയ ചാവേറിനെ തടഞ്ഞതിനെ തുടര്‍ന്ന് ചാവേര്‍ പൊട്ടിത്തെറിക്കുകയായിരുന്നു. കനത്ത സുരക്ഷ ബന്ധവസ്സിലുള്ള കോണ്‍സുലേറ്റിനെ കനത്ത ആക്രമണത്തിലൂടെ തകര്‍ക്കാനായിരുന്നു പദ്ധതി. എന്നാല്‍ സുരക്ഷാ ഉദ്യോഗസ്ഥരുടെ സമയോചിത ഇടപെടലിലൂടെ വന്‍ ആക്രമണം തടയുകയായിരുന്നു.
സംഭവത്തില്‍ രണ്ട് സുരക്ഷാ ഉസോഗസ്ഥര്‍ക്ക് പരുക്ക് പറ്റിയതായും ഇവരെ ആശുപത്രിയിലേക്ക് മാറ്റിയതായും അധികൃതര്‍ അറിയിച്ചിരുന്നു. സംഭവത്തെ തുടര്‍ന്ന് കോണ്‍സുലേറ്റ് സ്ഥിതി ചെയ്യുന്ന ജിദ്ദയിലെ അല്‍ അന്‍ലദുസ്, ഫലസ്തീന്‍, അല്‍ ഹംറ, ഹായില്‍ പ്രദേശങ്ങള്‍ സുരക്ഷാ ഉദ്യോഗസ്ഥരുടെ വലയത്തിലാണ്.